Портпаролката на руското Министерство за надворешни работи, Марија Захарова, денеска изјави дека Русија има докази дека вооружените сили на Украина користеле муниција со бел фосфор во септември.
Таа рече дека руските агенции за спроведување на законот, заедно со руското Министерство за одбрана, прибавиле докази за повторна употреба на муниција со бел фосфор, која била фрлена од беспилотни летала и дека сите инволвирани ќе одговараат, пренесе Риа Новости.
Според неа, овој факт укажува дека Украина поседува хемиско оружје кое не е отстрането во согласност со меѓународните прописи, како и можноста за синтеза на високо отровни материи кои содржат фосфор.
„Запаливата муниција исполнета со бел фосфор што ја користат Украинците е неселективно оружје и е забранета со Протоколот 3 од Женевската конвенција. Овие злосторства и оние кои се вклучени во нив неизбежно ќе бидат казнети“, рече таа.
Муницијата со бел фосфор е многу запалива и исклучително отровна, а белиот фосфор е отровен за луѓето, може да влезе длабоко во крвотокот преку кожата и на тој начин да ги отруе бубрезите, црниот дроб и срцето, но и да доведе до откажување на бројни органи.
Украина ги отфрли руските обвинувања за употреба на бел фосфор
Украина денеска ги отфрли обвинувањата на Русија дека користела дронови за фрлање бел фосфор во септември, нарекувајќи ги „лажни и бесмислени“.
Официјални лица од Киев тврдат дека Украина постапува целосно во согласност со меѓународните обврски за контрола на оружјето.
„Сигурни сме дека Русија, со ваквите лажни обвинувања, се обидува да ја префрли одговорноста за своите постапки и да ја измами меѓународната јавност“, изјави портпаролот на украинското Министерство за надворешни работи, Хеорхи Тики во писмена изјава за Ројтерс.