Марија Захарова, портпаролка на Министерството за надворешни работи на Руската Федерација, во соопштение објавено на социјалните мрежи предупреди дека „историските паралели“ меѓу Грција и Русија се во опасност да станат „цврста двојна линија меѓу нас“.
Руската функционерка се фокусирала на одлуката на Грција да прогласи 12 руски дипломати за „личност нон грата“ на 6 април, приклучувајќи им се на другите европски земји кои презедоа слични чекори како одговор на наводите за злосторства извршени од руските сили врз цивилите во Украина.
Грчкото МНР соопшти дека одлуката е донесена во согласност со Виенската конвенција за дипломатски односи од 1961 година и Виенската конвенција за конзуларни односи од 1963 година. Руската амбасада во Атина ја осуди одлуката на Грција и предупреди на последиците.
„Силно протестиравме против овој неоправдан и непријателски чекор кој има за цел дополнително да ги уништи нашите билатерални односи“, соопшти руската амбасада.
Во објава на социјалните мрежи, Захарова пожали за распадот на односите меѓу Русија и Грција и навлегува во историските врски меѓу двете земји.
„Имаше време кога Русија ѝ помагаше на Грција да ја постигне независноста и да ја врати нејзината државност, нејзиниот прв шеф беше претходно руски министер за надворешни работи, но сега дипломатските односи на земјата со Русија се речиси сведени на ништо“, предупреди Захарова.
Таа додаде дека „ова се случи и покрај фактот што ја делиме истата вера со Грците, истите традиции и дека секогаш сме биле таму за да им помогнеме на нашите грчки пријатели“.
„Ова не е толку прашање за евроатлантска солидарност што го брише минатото, бидејќи суверен избор на секој народ е да одлучи кому да му оддаде почит. Што е уште полошо, тоа ги лишува луѓето и нациите од нивната иднина, независноста и право на суверени избори“, заклучи Захарова.