Украинскиот претседател Володимир Зеленски изјави за Си-Ен-Ен дека Украина не е подготвена да се откаже од територијата во источниот дел на земјата за да ја заврши војната со Русија. Тој исто така рече дека украинската армија е подготвена да се бори против руската армија во регионот на Донбас во битка за која вели дека може да „влијае на текот на целата војна“.
Во петокот во ексклузивното интервју за Џејк Тапер од Киев на Си-Ен-Ен, Зеленски рече дека неговата земја нема гаранција дека Русија нема да се обиде повторно да го преземе Киев доколку успее да го заземе Донбас. „Затоа ни е многу важно да не дозволиме да застанат на свои нозе, бидејќи оваа битка може да влијае на текот на целата војна“, рече Зеленски.
Тој додаде дека нема апсолутно никаква доверба во руската армија и нивното раководство. „Погледнете што се случи во Буча. Јасно е дека ова не е војна, ова е геноцид. Тие само убиваа луѓе. Не војници – луѓе. Тие само пукаа во луѓето на улиците. Луѓето возеа велосипеди, возеа автобуси или само шетаа по улиците“, рече тој.
Истакна дека минатата недела разговарал со францускиот претседател Емануел Макрон и дека сака да ја посети Украина за да ги види злосторствата од прва рака.
„Мислам дека тој сака да преземе некои чекори за да се осигура дека Русија ќе се вклучи во дијалогот. Само му кажав дека сакам да разбере дека ова не е војна, туку ништо друго освен геноцид“, рече тој и додаде дека го поканил да дојде во Украина, кога ќе имал можност.
Украинскиот претседател сака и американскиот претседател Џо Бајден да ја посети Украина. Зеленски, кој го загуби своето семејство во Холокаустот, беше прашан што мисли за политичарите ширум светот да кажат „никогаш повеќе“ на Меѓународниот ден на сеќавање на холокаустот, со оглед на тоа што се случува во неговата земја.
„Не му верувам на светот. Не веруваме во зборови. По ескалацијата на Русија, ние не им веруваме на нашите соседи. Ние не веруваме во сето ова“, рече тој и посочи дека веруваат само во себе, својот народ, вооружените сили и верувањето дека земјите ќе ги поддржат – не само со зборови туку и со дела.
Зеленски рече дека дополнителните 800 милиони долари што Бајден ги одобри минатата недела за Украина за ново и понапредно оружје се корисни – но потребно е повеќе.
„Чувствувам дека имаме почист дијалог во моментов. Тоа беше дијалог кој имаше некои пресврти. И не само муабет. Беше многу, многу тешко бидејќи нема многу земји кои навистина ни помогнаа“, рече тој за Си-Ен-Ен.
Тој отфрли некои загрижености изразени од Соединетите Држави и други земји дека украинските војници не биле обучени да користат ниедно оружје што земјата го барала.
„Подготвени сме да користиме секаков вид опрема, но таа треба да биде доставена многу брзо. И имаме можност да научиме како да користиме нова опрема. Но, таа мора брзо да дојде“, рече тој.
Зеленски рече дека е подготвен да соработува дипломатски со Русија за да се обиде да стави крај на војната, но дека руските напади врз Украинците го отежнуваат тоа. „Како што реков, која е цената на сето ова? Тоа се луѓе. Многу луѓе беа убиени. И кој ќе плати за сето ова на крајот? Тоа е Украина. Само ние“, рече тој.
На крајот новинарот на CNN го праша како би сакал да биде запаметен. „Како човечко суштество кое го сакаше животот во потполност. И кој го сакаше своето семејство и својата татковина. Дефинитивно не како херој. Сакам луѓето да ме гледаат онаков каков што сум – обичен човек“, заклучи тој.