Украинскиот претседател Володимир Зеленски активно го промовира својот мировен план, кој се состои од 10 точки, а за него разговарал и со американскиот претседател Џо Бајден.
Зеленски ги повикал светските лидери да одржат глобален мировен самит врз основа на неговиот план.
Ал Џезира ги пренесува најважните елементи од планот на украинскиот претседател, како и реакциите на предлогот:
Кој е планот на Зеленски?
Претседателот Зеленски за прв пат го претставил својот мировен план на самитот на Г20 во ноември. Планот предвидува:
– Безбедност од радијација и нуклеарна активност, со фокус на враќање на безбедносните нивоа околу Запорожје, најголемата нуклеарна централа во Европа, која моментално е под руска окупација.
– Безбедност на храната, која вклучува заштита и уверување на извозот на украинското жито во најсиромашните нации во светот.
– Енергетска безбедност, со фокус на ограничување на цените на руските енергетски производи, како и помагање на Украина да ја обнови енергетската инфраструктура, од која половина е оштетена во руските напади.
– Ослободување на сите затвореници и депортирани, вклучително и воени затвореници и деца депортирани во Русија.
– Враќањето на територијалниот интегритет на Украина и прифаќањето на границите на Украина од страна на Русија според Повелбата на ОН, која според Зеленски „не е предмет на преговори“.
– Повлекување на руските војници и прекин на конфликтот, обновување на државните граници на Украина со Русија.
– Правда, вклучително и формирање на специјален суд за гонење на руските воени злосторства.
– Спречување на екоцид и заштита на животната средина, со фокус на деминирање и реставрација на пречистителни станици.
– Спречување на ескалација на конфликтот и изградба на безбедносна архитектура во евроатлантската област, која вклучува гаранции кон Украина.
– Потврда за крајот на војната, вклучително и потпишување на документот од инволвираните актери.
Предлог за мировен самит
Во декември, Зеленски ги повика лидерите на Г7 да ја поддржат неговата идеја за глобален мировен самит на кој ќе се разговара за неговиот план „целосно или делумно“.
Каков беше глобалниот одговор?
Русија овој месец го отфрли предлогот на украинскиот претседател и во вторникот повтори дека нема да отстапи од ниту еден дел од територијата што ја зазеде насилно, што сочинува околу една петтина од територијата на Украина. Русија тврди дека ги анектирала окупираните делови.
Зеленски го презентира својот план пред светските лидери како што се американскиот претседател Бајден, францускиот претседател Емануел Макрон и индискиот премиер Нарендра Моди, чија земја го презеде претседавањето со Г20.
Западната поддршка за украинската армија достигна милијарди долари, а напорите ги предводи Вашингтон. Земјите му понудија помош на Киев во деминирање и поправка на енергетската инфраструктура.
Сепак, реакциите на планот на украинскиот претседател, како и на предлогот за мировен самит беа повнимателни.
За време на посетата на Зеленски на Вашингтон минатата недела, Бајден рече дека тој и Зеленски „споделуваат идентична визија“ за мир и дека САД се решени да и помогнат на Украина да се одбрани.
Лидерите на земјите-членки на Г7 изјавија дека се решени да донесат мир во Украина „во согласност со нејзините права утврдени во Повелбата на ОН“.
Генералниот секретар на ОН, Антонио Гутереш, рече дека изгледите за мировни преговори во моментов се мали.
„Верувам дека воениот конфликт ќе продолжи и мислам дека сè уште треба да го чекаме моментот кога ќе бидат можни сериозни мировни преговори“, рече Гутереш кон крајот на декември.