Албанскиот премиер Еди Рама разговарал со украинскиот претседател Володимир Зеленски, кој порача дека Европа мора да биде на преговарачка маса и дека се што е поврзано со Украина мора да се случи со учество на Киев.
„Имав добар разговор со премиерот на Албанија и се заблагодарив на албанската влада и народ за поддршката за Украина и нашиот народ“, напиша Зеленски.
Тој објави дека разговарале за многу важни теми – заеднички проекти и пошироки перспективи, како и европски дипломатски иницијативи.
„Клучно е Европа да биде на преговарачка маса. Сè што е поврзано со Европа мора да ја вклучи Европа, а сè што е поврзано со Украина мора да ја вклучи Украина. Заедничката визија и координираните чекори се од суштинско значење за постигнување праведен и траен мир. Работиме заедно на зајакнување на безбедноста низ Европа. Ви благодариме за поддршката“, додаде Зеленски.
Светот е во очекување на средбата Трамп-Путин најверојатно кон крајот на месецов. Кремљ меѓу редови зборува за подготовките. В понеделник, европските лидери во Киев треба да ја одбележат тригодишнината на војната во Украина.