Москва беше цел на украински напади со беспилотни летала втора ноќ по ред, само неколку дена пред воената парада по повод Денот на победата на Црвениот плоштад. Настанот, кој традиционално го предводи рускиот претседател Владимир Путин, оваа година се одржува под засилени безбедносни ризици и предупредувања од украинската страна.
Градоначалникот на Москва, Сергеј Собјанин, соопшти дека најмалку 19 дронови биле соборени од руската противвоздушна одбрана пред да стигнат до централниот дел на градот. Тој истакна дека интензитетот на нападите значително се зголемил во однос на претходната ноќ, кога беа уништени четири беспилотни летала.
Нападите се случуваат во пресрет на пристигнувањето на кинескиот претседател Си Џинпинг во Москва, кој треба да присуствува на парадата на 9 мај како дел од тридневната државна посета. Кремљ потврди дека, покрај Си, присутни ќе бидат и претседателите на Бразил, Виетнам, Белорусија и други државници.
Денот на победата се смета за еден од најзначајните државни празници во Русија и често се користи од страна на претседателот Путин за демонстрација на воената моќ и зајакнување на домашната поддршка. Сепак, безбедносната ситуација годинава е неизвесна, што отвора прашања околу безбедноста на парадата.
Украинскиот претседател Володимир Зеленски претходно изјави дека неговата земја не може да гарантира безбедност за странските претставници кои ќе присуствуваат на парадата, нагласувајќи дека „Руската Федерација е одговорна за нивната безбедност“.
Зеленски исто така го отфрли едностранoто тридневно примирје прогласено од Путин, барајќи подолг прекин на огнот, најмалку 30 дена, како услов за сериозни мировни напори. Во меѓувреме, руските медиуми јавија дека воената парада во Севастопол, на анектираниот Крим, е откажана поради безбедносни причини. Одлуката следува по уништувањето на руски борбен авион Су-30 од страна на украински поморски дрон во близина на пристаништето Новоросијск, прв успешен напад од ваков вид.
Ситуацијата останува напната, а вниманието на светската јавност е насочено кон тоа дали парадата во Москва ќе се одржи според планот или ќе биде нарушена од понатамошни напади.