Претседателот на Чешка, Милош Земан и се извини на Србија за бомбардирањето на НАТО во 1999 година, оценувајќи дека тоа е „грешка“ и „полошо од злосторство“ и побара прошка од српскиот народ.
„Како човек, би сакал да го замолам српскиот народ да ни прости. Мене ми пречеше цело време. Со ова барање за прошка, ја решив мојата долгогодишна траума, бидејќи тоа го олеснува каењето“, рече Земан во заедничкото обраќање на новинарите по средбата со српскиот претседател Александар Вучиќ.
Земан објасни дека Чешка, кога започнала бомбардирањето на тогашна СР Југославија, била членка на НАТО само неколку недели и дека затоа не можела да најде држава што ќе ја поддржува во спротивставувањето на нападот врз Србија.
На 24 март 1999 година, земјите-членки на НАТО ја започнаа операцијата Allied Force – бомбардирањето на Сојузна Република Југославија, кое траеше до 1 јуни 1999 година, со што се стави крај на конфликтот во Косово. 78-дневните непрекинати напади сериозно ја оштетија инфраструктурата, деловните субјекти, училиштата, здравствените установи, медиумските куќи, спомениците на културата, црквите и манастирите, а се проценува дека најмалку 1.300 лица биле убиени и околу 12.000 повредени.
Економските експерти ја проценуваат штетата на околу 30 милијарди долари, додека некои проценки се движат до 100 милијарди.
Благодарение на Земан, Вучиќ рече дека српскиот народ никогаш нема да го заборави неговото извинување.
„Српскиот и чешкиот народ досега беа пријателски, а од денес се братски“, истакна Вучиќ за време на своето обраќање, што го пренесуваа во живо од Прага дел од белградските електронски медиуми.
Тој оцени дека „Земан е храбар човек, кој не ласка никого“ и го најави доаѓањето на чешкиот претседател во Србија на крајот на годината, кога се очекува отворање на чешката куќа во Белград.