Градоначалникот на Општина Центар Андреј Жерновски денеска обвини дека државата продава атрактивно земјиште во оваа општина по многу ниски цени, а Министерството за транспорт веќе една година не одговара на барањето Центар да управува со градежното неизградено земјиште.
Според Жерновски, државата ја продала парцелата меѓу арената Филип Втори и Паркот на Франкофонијата во Градскиот парк, за кое почетната цена била 40 евра за метар квадратен, а во наддавањето е зголемена за, како што рече, само 220 денари.
– Продавање атрактивна земја за 40 евра е криминогено и безмилосно раскрчмување на атрактивно земјиште, рече Жерновски и дополни дека на скопското Кале е огласено земјиште за продажба со почетна цена од 100 евра за метар квадратен, за изградба на објект во барокен или нео-класицистички стил./МИА