По контролата што ја спровеле Одделот за внатрешна контрола при МВР, Државниот инспекторат за транспорт и Мобилната единица за безбедност во сообраќајот, при што беа изречени 32 глоби за неплаќање патарини, меѓу едно од казнетите лица бил и шефот на Кабинетот на вицепремиерот Артан Груби, објави „А1он“.
Тој добил глоба откако поминал наплатна станица без да плати, со злоупотреба на флешери и службена легитимација.
„Шест полициски службеници ја поминале наплатната станица без да платат, со злоупотреба на флешери и службена легитимација и против нив покрај изречената глоба, ќе бидат преземени мерки и од страна на Одделот за внатрешна контрола“, соопштија попладнево од МВР.
Незаконско поставување флешери се казнува прекршочно, а дозвола за нивна употреба имаат само возилата на полицијата и воената полиција кои вршат придружба. Вакви уред може да се вградат и во возила определени со акт на Владата.