Според првите прелиминарни проценки, Еврозоната во март забележа рекордни 36,8 милијарди евра суфицит во трговијата со стоки со остатокот од светот, објави денес Евростат.
Вредноста на извозот на стоки од еврозоната кон остатокот од светот во март изнесуваше 279,8 милијарди евра, што претставува раст од 13,6 проценти на годишно ниво, додека увозот во исто време се зголеми за 8,8 проценти на годишно ниво на 243 милијарди евра.
Резултатот е поповолен отколку во февруари, кога еврозоната забележа суфицит од 24,8 милијарди евра во трговијата со стоки. Европската Унија регистрираше суфицит од 35,3 милијарди евра во трговијата со стоки во март оваа година, а во истиот месец во 2024 година, суфицитот изнесуваше 22,3 милијарди евра.
Вредноста на извозот на стоки од Европската Унија кон остатокот од светот во март изнесуваше 254,8 милијарди евра, што е за 15,2 проценти повеќе во однос на истиот месец минатата година, додека вредноста на увозот во ЕУ се зголеми за 10,4 проценти на годишно ниво на 219,5 милијарди евра.
Покрај тоа, вредноста на извозот од Европската Унија во САД, кој е во центарот на вниманието поради царините на Трамп, се зголеми во март, пред воведувањето на повисоки царини, за дури 59,5 проценти на годишно ниво, на 71,4 милијарди евра, а увозот од САД за 9,4 проценти на годишно ниво, на 30,7 милијарди евра.
Како што покажуваат податоците, трговскиот суфицит на Европската Унија со САД во март изнесуваше 40,7 милијарди евра. Новите податоци ќе бидат објавени на 13 јуни, според веб-страницата на Евростат.