Производителите на автомобили минатата година ги објавија плановите за нови модели и производствени капацитети за електрични возила. Ова ја прави 2022 година година во која се повеќе потрошувачи ќе одлучат дали е време да го купат својот прв електричен автомобил, напиша аналитичарот Конор Сен во коментар за „Bloomberg LP“.
Дали вреди да се преземе овој чекор?
Веројатно зависи од цената и сегментот на пазарот што го гледате.
„Колку е повисока цената, толку повеќе треба да размислувате за купување електричен автомобил сега, наместо да чекате уште неколку години“, објаснува Сен.
Еве неколку причини:
Производителите на автомобили лансираат модели од повисока класа пред оние од пониска класа, па изборот е подобар во високата класа. Дополнително, неопходно е да се земе предвид преостанатата вредност на половните автомобили во иднина – побарувачката за автомобили на бензин ќе се намали, така што купувањето на нов автомобил сега значи дека ќе чини многу помалку кога ќе бидете подготвени да го замените.
Важно е да се има предвид дека голем дел од однесувањето на потрошувачите се должи на постапките на производителите на автомобили. Производителите добија порака од инвеститорите дека ќе бидат наградени за забрзување на транзицијата кон електрични автомобили, додека профитот од автомобилите на бензин ќе се користи главно за финансирање на овие инвестиции.
Големите производители на автомобили, по примерот на Tesla Inc., почнуваат со модели од повисоко ниво, и затоа што побарувачката на потрошувачите е најсилна таму и затоа што е полесно да се оствари профит по повисоки цени, додека обемот на продажба останува далеку под оној на бензинските автомобили.
Дополнително на искушението за потрошувачите е и фактот што експертите во индустријата даваат високи оценки за овие нови скапи модели на електрични возила. Магазинот MotorTrend го прогласи Rivian’s R1T за пикап на годината од 74.000 долари, а уште поскапиот Lucid Air за автомобил на годината. Двата автомобили неодамна почнаа да се доставуваат до потрошувачите и имаат долги листи на чекање.
Можеби ќе бидете импресионирани од она што сте го виделе досега, но повеќе би сакале да почекате уште малку додека не се изгради инфраструктурата за електричните возила, како што се станиците за полнење. Но, пресметувањето на трошоците за купување на кое било ново возило, исто така, вклучува и колку ќе чини во годините што доаѓаат кога ќе бидете подготвени да го замените или продадете. Просечното време на задржување на новите автомобили од страна на возачите во САД е 6 години. Значи, ако купувате нов автомобил во 2022 година, треба да размислите за пазарот на половни автомобили во 2028 година или подоцна.
Демографските податоци на сопствениците на електрични автомобили се многу слични на оние на извршниот директор на Tesla, Елон Маск. Тие се просечен маж, на возраст од 40 до 55 години, со годишен приход на домаќинството од над 100.000 долари. Процентот на нови автомобили продадени во САД кои се електрични во 2022 година можеби сè уште е едноцифрен, но за оваа демографија ќе биде многу поголем.
До 2028 година, кога вкупниот пазарен удел на електрични возила во САД би можел да достигне 30%, поголемиот дел од богатите помлади и средовечни потрошувачи можат да купуваат електрични автомобили и пикапи. Тоа ќе има големо влијание врз вредноста на половните автомобили со бензински мотори, а бројот на купувачи ќе се намалува со секоја измината година.
Иако се уште може да има стабилен пазар за користени Honda Accords во 2028 година, пазарот на користени бензински седани и спортски автомобили, по цена од 40.000 долари, најверојатно ќе биде понестабилен бидејќи луѓето од овој сегмент се префрлаат на електрични автомобили.
Во меѓувреме, иако сè уште е на почетокот на својата автомобилска историја, пазарот на половни автомобили Tesla Model 3 е стабилен. Кумулативното влијание на рекламните кампањи не треба да се занемари. Производителите на автомобили не инвестираат десетици милијарди долари во електрични автомобили само за да ги чуваат во фабрики и застапништва. Тие ќе користат и рекламни кампањи за да ги натераат потрошувачите да веруваат дека се технолошки писмени и напредни компании. До 2028 година, производителите на автомобили ќе сакаат богатите купувачи на автомобили да веруваат дека автомобилите на бензин се толку добри, како флопи дисковите или фиксните телефони – нешто што вашиот дедо сè уште го има во својата куќа.
А цената? Во една неодамнешна студија, Goldman Sachs истакна дека некои сегменти на пазарот на електрични возила се веќе конкурентни во однос на трошоците во споредба со автомобилите на бензин, со оглед на трошоците за гориво и одржување. По цена на галон бензин (3,78 литри) од околу 3 долари, заштедите се околу 1.000 долари годишно, така што по околу пет години, купувањето електричен автомобил за 60.000 долари е еднакво на купување автомобил со бензински мотор за 55.000 долари. И ова е пред да се земат предвид даночните олеснувања.
Праведно е да се изрази загриженост за неизвесноста околу издржливоста и стандардите на батериите што ги напојуваат електричните возила. Батериите некако се влошуваат со текот на времето – батеријата на Tesla Model S губи 5% од капацитетот за полнење по првите 50.000 км – но се смета дека батериите на електричните автомобили траат помеѓу 10 и 20 години пред да треба да се заменат.
Исто така, можно е технолошкиот напредок да доведе до радикално различни типови на батерии за напојување на автомобилите во иднина. На одредено ниво, издржливоста на батериите се мери наспроти изгледите дека пазарот на автомобили на бензин ќе продолжи да се намалува.
За обичните купувачи на автомобили кои се свесни за буџетот, сè уште постои причина да бидат уверени дека новиот автомобил на бензин купен во 2022 година ќе одржи пристојна вредност на пазарот на половни автомобили до крајот на деценијата. Но, за богатите потрошувачи тоа не е толку сигурно. Оние скапи купувачи кои планираат да почекаат уште малку пред да се префрлат на електричен автомобил треба да размислат да го сторат тоа подоцна оваа година.