Зошто цените на електричните автомобили незапирливо паѓаат?

од Vladimir Zorba
177 прегледи

Цените на електричните автомобили паѓаат ширум светот. Ако ве прашаат зошто се случува ова, веруваме дека повеќето би одговориле исто: Затоа што никој не сака да ги купи.

Сепак, причините се нешто посложени…

Значи, како производителите успеваат да ги намалат трошоците за производство на електрични возила? Според „Јутарњи“, ова се три клучни причини зошто стануваат подостапни:

Трошоците за батериите паѓаат

Литиум-јонските батерии отсекогаш биле еден од најзначајните трошоци за производство на ЕВ, но годишното истражување на „Блумберг“ покажува дека нивните трошоци се намалени за 20 отсто до 2023 година, што претставува најголем пад на цените на литиум-јонските батерии во последните седум години. Ова е значаен чекор кон постигнување слични цени меѓу автомобилите со електрични и мотори со внатрешно согорување.

Растот на глобалниот капацитет за производство на батерии, предводен од Кина, придонесува за падот на трошоците. Се очекува земјата во блиска иднина да произведе доволно батерии за да задоволи 92 отсто од глобалната побарувачка.

„Голдман Сакс Рисрч“ предвидува дека цените на батериите би можеле да паднат за 50 отсто следната година во споредба со 2023 година.

Раст на продажбата на евтини кинески електрични возила

Веќе во 2023 година, три од пет електрични автомобили продадени во Кина беа поевтини од споредливите модели со мотори со внатрешно согорување. Од друга страна, Меѓународната агенција за енергија (ИЕА) тврди дека електричните автомобили продадени во Европа меѓу 2022 и 2023 година (и покрај падот на просечните цени на батериите во тој период) биле приближно 40 отсто поскапи од конвенционалните автомобили.

Старата економска пресметка вели дека зголемената конкуренција ги намалува цените. И што подобар пример од BYD, кој ја симна Tesla од тронот како најголем светски производител на електрични автомобили, продавајќи автомобили во вредност од 107 милијарди долари ширум светот во споредба со 97,7 милијарди долари на Tesla, пишува ThisisMoney.

Поголема достапност на електрични автомобили

Економските закони велат дека со зголемената понуда доаѓа и пад на цените, па приливот на нови електрични автомобили во продажба дополнително ги намалува цените. Понудата на нови електрични автомобили постојано расте бидејќи се повеќе производители го електрифицираат својот опсег.

Некои од нив сакаат да го електрифицираат својот опсег и да го гледаат како иднина, но многумина се притиснати од европските цели за возила со нулта емисија – додека се приближуваме до забраната за продажба на нови бензински и дизел автомобили.

Слични содржини