Украина и Русија денеска извршија нова размена на воени заробеници, при што двете страни вратија по 205 борци, соопштија официјални извори од Киев и Москва. Украинскиот претседател Володимир Зеленски потврди дека 205 украински бранители се вратени дома, додавајќи дека тие биле држени во различни затвори низ руските региони, каде, како што рече, „единствената цел била да го понижат и уништат човештвото“.
„Тие беа расфрлани низ многу руски региони, затворени во затворски систем со една задача: да го понижат и уништат човештвото“, изјави Зеленски.
Координативниот штаб за третман на воени заробеници информираше дека меѓу ослободените има претставници на различни украински безбедносни структури, вклучувајќи ги Вооружените сили на Украина, особено Морнарицата, Воздухопловните сили, Десантните сили и Територијалната одбрана, како и припадници на Националната гарда и Државната гранична служба. Од вкупниот број, тројца се офицери, а останатите 202 се војници и наредници.
Ukraine has returned 205 people from Russian captivity, including defenders of Mariupol and the entire front line, representing all branches of the armed forces. pic.twitter.com/Rynf7CWfDO
— KyivPost (@KyivPost) May 6, 2025
Од почетокот на целосната руска инвазија врз Украина, вкупно 4.552 украински државјани, војници и цивили, биле ослободени од заробеништво, соопшти Зеленски. Размената доаѓа по неколку претходни акции. На 19 април беа вратени 277 украински борци, на 19 март 175, а на 9 февруари 150 војници. Во јануари беше договорен нов формат за размена, кој вклучува враќање на тешко ранети и болни лица.
Руското Министерство за одбрана потврди дека 205 руски војници се вратени од територијата под контрола на Украина, додавајќи дека сите се пренесени во Белорусија, каде им се обезбедува психолошка и медицинска помош, како и можност за контакт со семејствата. „Како резултат на преговарачкиот процес, 205 руски војници беа вратени од територија под контрола на киевскиот режим“, се наведува во соопштението на министерството.
Во посредувањето и хуманитарната логистика учествуваа Обединетите Арапски Емирати, потврди руската страна.