Американскиот претседател Доналд Трамп изјави дека добил порака од кинескиот претседател Си Џинпинг, дека неговиот состанок со севернокорејскиот лидер Ким Џонг Ун бил добар.
Трамп на Twitter напиша дека Ким се радува на состанокот со него, кој е предвиден да се случи во мај, но до тогаш мораат да бидат задржани санкциите и притисокот на Северна Кореја.
„Добив порака синоќа од Си Џинпинг од Кина дека неговиот состанок со Ким Џонг Ун поминал добро и дека Ким се радува на состанокот со мене. Во меѓувреме, и за жал, максималните санкции и притисокот мораат да се задржат по секоја цена“, напиша Трамп.
Ким од неделата до денеска беше во посета на Кина, неговата прва посета во странство од доаѓањето на власт во 2011 година, потврдија кинеските медиуми и додадоа дека Ким се сретнал со претседателот Си Џинпинг.
Received message last night from XI JINPING of China that his meeting with KIM JONG UN went very well and that KIM looks forward to his meeting with me. In the meantime, and unfortunately, maximum sanctions and pressure must be maintained at all cost!
— Donald J. Trump (@realDonaldTrump) March 28, 2018
Севернокорејскиот лидер изјави подготвеност на престојниот состанок со Трамп да се залага за денуклеаризација на Корејскиот полуостров. Како што пренесуваат кинеските медиуми, Ким изјавил дека е подготвен за денуклеаризација во рамките на волјата на поранешните севернокорејски лидери.
„Нашата постојана позиција е посветеноста кон денуклеаризација на Корејскиот полуостров во рамките на волјата на поранешните лидери Ким Ил Сунг и Ким Џонг Ил“, изјави лидерот на Северна Кореја, чија посета на Кина беше чувана во тајност се до неговото враќање во Северна Кореја.