Американскиот кошаркар Џаред Двејн Шо (34) е уапсен во Индонезија поради сомнение за обид за шверцување нелегални супстанции. Локалната полиција соопшти дека Шо, кој игра во Индонезиската кошаркарска лига од 2022 година и потекнува од Далас, бил приведен на 7 мај во неговиот стан во областа Тангеранг, во близина на Џакарта. За време на претресот, полицијата пронашла и запленила 132 бомбони со канабис.
Началникот на полицијата на аеродромот Соекарно-Хата, Роналд Сипаџунг, рече дека апсењето било резултат на дојава од царинската служба, која забележала сомнителен поштенски пакет од Тајланд. Иако канабисот е легализиран во Тајланд од ноември 2024 година, во Индонезија законите за дрога се многу строги. Трговијата со дрога може да донесе доживотен затвор или дури и смртна казна.
Шо признал дека планирал да ги сподели бомбоните со колегите кошаркари. Вкупната тежина на пронајдената супстанца изнесувала 869 грама. Кошаркарот претходно играл за повеќе тимови во Индонезиската лига, а минатата година потпишал договор со тимот Тангеранг Хокс. Менаџерот на клубот, Тики Сувантикно, изјави дека клубот го осудува неговото однесување и веднаш го отпуштил од тимот.
View this post on Instagram
Претседателот на лигата, Будишатријо Џивандоно, најави дека Шо има доживотна забрана за натпреварување во Индонезиската кошаркарска лига.
„Не толерираме играчи или официјални лица кои се поврзани со дрога. Во кошарката нема место за дрога“, изјави Џивандоно.
Инаку, Индонезија е позната како една од главните транзитни точки за меѓународната трговија со дрога. Во земјата има околу 530 лица осудени на смрт, од кои 96 се странци, најчесто за злосторства поврзани со дрога. Последните егзекуции биле извршени во 2016 година.