Во вчерашното невреме што го зафати Скопје, Центарот за управување со кризи примило пријави за 35 паднати дрвја, 15 бандери, 21 оштетен покрив, 10 поплавени домови и 2 оштетени возила. Најпогодени беа населбите Аеродром, Ново Лисиче и Маџари, каде што беа евидентирани најголемиот дел од штетите. Граѓаните од Кисела Вода исто така не беа поштедени од последиците на невремето.
„До денеска паѓаа стакла и се ронеше зидот од Градинаров при мало невреме, денес и кровот им летна во куќите околни“ напиша загрижен жител во Фејсбук групата „Ѕидот на Општина Кисела Вода“ и сподели фотографии, по што следеше канонада од коментари од граѓани кои застанаа во одбрана на градоначалникот Орце Ѓорѓиевски.
Жестоката дискусија дали Ѓорѓиевски треба да дојде на лице место и да понуди помош на жителите и кој е одговорен за штетата често личеше на „пожар“ во кој се бришеа коментари и се блокираа профили на лица кои се членови на групата, а кои имаат критички став кон работата на градоначалникот.
„Значи админите бришат сѐ што не им одговара. Колку инфантилно“, се само дел од коментарите.
Жители на Инџиково, Ченто, Трубарево и на Хиподром посочија дека како да поминало торнадо во нивните населби, кое оставило пустош зад себе. Жителите посочија на надвиснат електричен столб над улицата во Маџари.
Невремето со град и силен дожд по 17 часот предизвика проблеми во електродистрибутивната мрежа. Поради дефект на двата 110-киловатни далекувода што ги снабдуваат трафостаниците „Аеродром“ и „Исток“, жителите на Ново Лисиче и на Аеродром петнаесет часа беа без електрична енергија. Екипите на Електродистрибуција и МЕПСО работеа цела ноќ на санирање на дефектот, па вчера околу 10:00 часот струјата се врати во домовите на жителите на овие населби.