Холивудската актерка Скарлет Јохансон побара од владата да донесе закон за ограничување на употребата на вештачка интелигенција, потег што го направи откако видео направено со помош на вештачка интелигенција, во кое „учествува“ таа и други познати личности, стана вирално на интернет.
Јохансон во изјава за магазинот „People“ рече дека тоа е сериозен проблем.
„Ужасно е што американската влада е парализирана кога станува збор за донесување закон што ги штити сите граѓани од опасностите што ги носи вештачката интелигенција“, рече актерката.
Во контроверзното AI видео, Јохансон се појавува заедно со други познати личности, вклучувајќи ги Џери Сајнфелд, Мила Кунис, Џек Блек, Дрејк, Џејк Гиленхал, Адам Сендлер и други, сите облечени во маици со зборовите „Канjе“, тупаница што го покажува средниот прст и ѕвездата на Давид во центарот.
Је, порано познат како Канје Вест, минатата недела се врати на социјалната мрежа Х и објави антисемитски коментари. Тој, исто така, почна да продава маици со кукасти крстови на својата веб-страница, која оттогаш е отстранета.
„Јас сум Евреинка која не толерира антисемитизам или говор на омраза од каков било вид. Исто така, цврсто верувам дека потенцијалот за говор на омраза се множи со AI технологијата. Тоа е многу поголема закана отколку тоа едно лице да ја преземе одговорноста. Мора да ја истакнеме злоупотребата на технологијата за вештачка интелигенција без оглед на нејзината порака или ризикуваме да ја изгубиме контролата врз реалноста“, рече Јохансон.
Таа апелираше до пратениците да донесат закони за ограничување на вештачката интелигенција и да го направат ова главен приоритет, а исто така посочи дека ова прашање има огромно влијание врз непосредната иднина на човештвото како целина.
И претходно ја критикуваше вештачката интелигенција кога оваа технологија стана подостапна. Во 2023 година, таа го тужеше развивачот на апликација за вештачка интелигенција за користење на нејзиното име и слика во онлајн оглас. Таа подоцна „го повика“ OpenAI за користење на нејзиниот глас за ChatGPT, по што гласот беше отстранет.
Минатата година, пратениците воведоа предлог-закон за борба против сексуално експлицитните „deepfake“ фалсификати, но има мал напредок во однос на другите форми на регулирање на технологијата за вештачка интелигенција.
Гувернерот на Калифорнија, Гевин Њусом стави вето на главниот закон за безбедност на технологијата за вештачка интелигенција во септември 2024 година, додека американскиот претседател Доналд Трамп ја смени наредбата на неговиот претходник Џо Бајден за воспоставување насоки за безбедност на вештачка интелигенција.
Оваа недела, САД и Велика Британија одбија да потпишат меѓународна декларација за вештачка интелигенција, која промовира „етичка“ употреба на технологијата.