Во градинките на општина Карпош владее сериозен недостиг на воспитувачи, негувателки и технички персонал, но Владата не дава дозволи за нови вработувања, и покрај тоа што средствата за нив се веќе предвидени во буџетот. Градоначалникот Стевчо Јакимовски денеска остро реагираше на нефункционалноста на системот, нарекувајќи го „партизиран и блокиран“.
„Имаме апсурдна ситуација – градинките се полни, а ние не можеме да вработиме никого. Лиценците за воспитувачи и негувателки се чекаат со месеци, иако се неопходни за да функционираат установите“, рече Јакимовски.
Проблемот не е изолиран – слична е состојбата и во градинките „Распеана младост“ и „Пролет“, каде поради пензионирања се појавија празни места што не се пополнети.
Дополнително, Јакимовски ја обвини Владата дека:
-
ѝ одзела 16 милиони денари на општината наменети за образование,
-
ги кочи три важни урбанистички планови,
-
селективно бара документација за легализација само од Карпош,
-
и сака да ја преземе спортската сала „Партизан 4“, иако во неа има вложувања од општината.
„Додека ние се бориме за подобри услови за граѓаните, централната власт не само што не помага, туку и ни прави пречки. Не може државата да ја водат луѓе што создаваат проблеми, наместо решенија“, додаде Јакимовски.