Светот со нетрпение очекува дали ќе се одржи средбата меѓу рускиот претседател Владимир Путин и украинскиот лидер Володимир Зеленски, која би била нивна прва директна комуникација по 2019 година. Ако состанокот се одржи во четврток во Истанбул, тоа би бил прв контакт меѓу лидерите од почетокот на војната во Украина, која започна во пролетта 2022 година.
Последниот пат кога се сретнаа беше на 9 декември 2019 година во Париз, како дел од Нормандискиот формат, во кој учествуваа и германската канцеларка Ангела Меркел и францускиот претседател Емануел Макрон. На тој состанок, главни теми беа прекинот на огнот, размената на затвореници и статусот на Донбас.
Тогаш, постигнат е договор за прекин на огнот и размена на затвореници до крајот на 2019 година, но тоа беше единствениот конкретен напредок. Сепак, политичките разлики останаа длабоки. Зеленски го опиша Путин како „прецизен и ладен преговарач“, додека самите преговори беа напорни и исцрпувачки за него.
Разлики во искуството: Зеленски и Путин
Кога Зеленски и Путин влегле во просторијата за состанок, атмосферата била ладна. Зеленски, само шест месеци по стапувањето на власт, не знаел како да се однесува, додека Путин, како искусен лидер, бил сосема смирен и контролиран. Зеленски нагласил дека Украина треба да ја врати контролата над целата граница со Русија, но Путин имал поинакви ставови, инсистирајќи дека рускојазичните области во источна Украина треба да добијат посебен статус.
Што се случува сега?
По шест години, состојбата е многу поинаква. Војната на Украина ескалира, а логиката на компромис е заменета со логиката на преживување. Кремљ сè уште не потврдил дали Путин ќе присуствува на состанокот, но Зеленски изјавил дека е подготвен за разговори ако Путин се појави.
Светот внимателно го следи ова, бидејќи многумина се прашуваат: Дали оваа средба може да доведе до каков било напредок во конфликтот? Или ќе биде само уште едeн обид за политичка игра? Тековните политички и воени околности ќе го одредат исходот.