Телевизијата „Al Jazeera Balkans“ денес престана со работа по 14 години емитување, а последните вести беа емитувани во 12 часот.
Како што е наведено во телевизиското соопштение, целиот тим на „Al Jazeera Balkans“ е горд на секој од 4.970 дена што ги поминал служејќи им на гледачите и читателите.
„Секогаш сме се обидувале да бидеме гласот на оние чии гласови не се слушаат, островот на вистината, културата на дијалогот и етичкото новинарство. Ви благодариме што сте со нас“, се наведува во соопштението на оваа телевизија.
До крајот на овој месец, „Al Jazeera Balkans“ ќе продолжи да емитува претходно снимена содржина, по што сигналот ќе биде исклучен.
Основана во 2011 година во Сараево како дел од „Al Jazeera Media Network“ од Доха, мрежата, покрај светските настани, покриваше и настани во балканскиот регион, со редакции во Белград, Загреб, Подгорица, Скопјe, Љубљана и Приштина.
Во претходните 14 години, „Al Jazeera Balkans“ беше препознатлива по својата содржина поврзана со документарниот сегмент.
Тоа е првата телевизија што емитува програма на друг јазик освен арапски и англиски.
Во 2018 година, „Al Jazeera Balkans“ го основа „AJB DOC“, фестивал на документарни филмови, кој се одржува во Сараево секој септември.
Причините за затворањето не се официјално познати, но се претпоставува дека станува збор за деловна одлука на Доха поради финансиски причини, а босанските медиуми како една од причините ги наведуваат „сомнителните зделки во соработка со локалните политичари“.