Претседателот на Република Српска, Милорад Додик, одржа прес-конференција во Бања Лука откако Обвинителството на Босна и Херцеговина утринава издаде налог за негово апсење.
Додик, премиерот на РС, Радован Вишковиќ и претседателот на Народното собрание, Ненад Стевандиќ треба да бидат приведени од правосудната полиција. Државната агенција за истраги и заштита (СИПА) добила наредба од Судската полиција на Судот на БиХ да помогне во приведувањето на обвинетите.
Лидерите на Република Српска се обвинети за „напад на уставниот поредок“ на Босна и Херцеговина.
Прв на пресот се обрати премиерот на Република Српска, Радован Вишковиќ, кој рече дека добил информација дека е „во хеликоптер за Белград“ и дека тоа се лаги. Тој вели дека очекувал налог за апсење.
-Ова го очекував и по пресудата што го снајде колегата во другиот субјект. И тогаш очекував и знам дека Обвинителството се мачеше да најде нешто. Ова што денес се случува во БиХ е дело на Кристијан Шмит, тој подлец, измамник, кому за жал некои институции во БиХ му даваат предност пред правните институции – рече Вишковиќ.
Тој им се обрати на граѓаните на Република Српска, со порака дека никогаш по своја волја нема да отиде во Судот и Обвинителството во Сараево.
– Причината е што не им верувам и не очекувам правда и правично судење. Подготвен сум денеска да се појавам пред кој било суд во регионот и околината и да одговорам за она што тие веруваат дека сум го направил – додаде Вишковиќ, велејќи дека „ова е ситуација кога некој пука од вистински пиштол“.
Тој истакна дека ова „не е закана од Република Српска“, туку повик за мир и дијалог, кои се „игнорираа“.
– Кога ќе решам да побегнам, ќе тргнам по патот и ќе видам кој ќе ми застане на патот – заклучи Вишковиќ.
Претседателот на парламентот Ненад Стевандиќ изјави дека ова е „финализирање на замислената операција Лауфер“ чија цел е „да ги онеспособи сите во Република Српска кои го имаат кредибилитетот на народот“.
– Кај нас нема страв, само страв од можни закани по животот и имотот на луѓето од РС. Правото на самоодбрана е најголемото право што го има еден народ, нема да се откажеме од него. Вчера немаше политичар од федерацијата кој не рече дека сите треба да бидеме уапсени. Има ли поголем атак на уставниот поредок? – праша Стевандиќ.
Тој нагласи дека и Додик и Вишковиќ имаат имунитет на територијата на Република Српска.
– Но, тие се изложени на прогон на територијата на Федерацијата БиХ, бидејќи Уставниот суд на БиХ ги поништи одлуките на Народното собрание на РС што ги донесовме минатата година за нивна заштита. Мораме да ве потсетиме и да кажеме дека освен што го правиме ова на мир, ние сме апсолутно во право. А да се биде во право во Босна и Херцеговина значи да се биде прогонуван. Луѓе кои бараат уништување на народ, република и војна, нивната харанга има за цел да ги загрози нашите уставни права, но и правото на живот. Веќе неколку дена има харанга која повикува на убиство на нас тројцата, тврди тој.
Додик потоа зеде збор.
– Не бркаат како да сме Ал Каеда. Не би препорачал СИПА (Државна агенција за истраги и заштита, уред.) да дејствува и верувам дека нема. Денеска е празник, мојот роденден, а овој подарок го добив од Сараево. Она што го прави заедничкиот муслимански потфат покажува дека муслиманите тргнале да ја уништат Република Српска. Тие постапуваат по одлуки на странец и го нарушуваат уставниот поредок на БиХ – рече тој.
Тој рече дека денеска се носи Законот за Специјалното обвинителство на Република Српска со кој „ќе се брани уставниот поредок“.
– Нема удар што не сум подготвен да го издржам за Република Српска. Ако некој мисли дека сме кукавици, тој е во голема грешка. Не очекувам некој да ме брани или некој да го жртвува животот за да не брани. Не сакавме ескалација, но сме принудени на тоа. Верувам дека ја имам поддршката од народот и ги повикувам да ни дадат уште поголема поддршка. Никој во Република Српска нема причина да биде вознемирен, истакна Додик.