Легендата на германскиот фудбал Томас Милер и официјално објави дека на крајот на сезоната го напушта Баерн Минхен по долги 25 години во клубот во кој ја мина целата своја кариера.
Милер (35) во Баерн пристигна како 10-годишник. Но, славната ера во клубот ќе заврши откако неговиот договор со баварскиот гигант истекува на крајот од сезоната.
Светскиот шампион со Германија, кој 12 пати беше шампион во Бундеслигата, најави дека го напушта клубот, но не потенцираше дали ја завршува кариерата или за првпат во кариерата ќе ја вкуси „сладоста“ на друг клуб.
The time has come … ❤️ #esmuellert #FCBayern #Müller25 pic.twitter.com/tMhzkO1jop
— Thomas Müller (@esmuellert_) April 5, 2025
„Јасно е дека денес е сè само не нормален ден за мене. Моите долги 25 години како играч на Баерн ќе завршат на лето. Тоа беше неверојатно патување обликувано од уникатни искуства, одлични игри и незаборавни победи“, рече Милер во емотивна изјава.
Тој додаде дека ќе ги гради и зачува односите со клубот и навивачите додека е жив. За крај изјави дека сака да ги слави титулите до крајот на сезоната, и да стигне до финалето на Лигата на шампионите кое симболично се игра на неговата „Алијанц Арена“ во Минхен.
Милер досега одигра 743 натпревари за Баерн, повеќе од кој било друг играч во историјата на клубот. На меѓународен план, тој беше дел од репрезентацијата на Германија која го освои Светското првенство во 2014 година.