Сергеј Собјанин, градоначалникот на Москва, објави дека Украина рано утринава извршила „масовен“ напад врз руската престолнина.
Тој рече дека поради нападот биле затворени три аеродроми во областа на Москва и дека избувнале пожари и биле оштетени станбени згради.
Собјанин информира дека се уништени најмалку 69 беспилотни летала кои се приближувале до главниот град на Русија.
„Експерти од службите за итни случаи се распоредени на местата каде што паднаа остатоците (на беспилотните летала)“, напишал московскиот градоначалник на Телеграм.
Ројтерс наведува дека се чини дека ова е најголемиот напад со украински беспилотни летала врз руската престолнина од почетокот на војната и дека најмалку едно лице е убиено.
– Денеска во четири часот наутро започна масовен напад со беспилотни летала врз Москва и Московската област. Во овој момент е познато дека едно лице загина, а три лица се повредени, објави на Телеграм гувернерот на Московскиот регион Андреј Воробјов.
„Дојче веле“ пренесува дека База, телеграмски канал поврзан со руските безбедносни служби, како и други канали на Телеграм, објави видео од повеќекратни пожари кои избувнале во станбени области на Москва по нападот.
За оваа вест засега нема коментар од Киев.
Снимки се појавија и на други социјални мрежи, со тврдења дека ова е најголемиот напад извршен од украинските сили врз руската престолнина досега.
Собјанин соопшти во објава на Телеграм дека беспилотни летала биле соборени над аеродромите во областите Раменское и Домодедово во Москва, меѓу другите места.
Овие аеродроми се наоѓаат на 40 до 50 километри југоисточно од Кремљ.