Најмалку 30 лица се повредени во напад со руски дронови врз железничката станица во украинскиот град Шостка во Сумиската област, потврди претседателот Володимир Зеленски, пишува „Скај њуз“.
Украинскиот претседател објави на социјалната мрежа X: „Дивјачки руски напад со дронови врз железничката станица во Шостка, Сумиската област“.
„Сите служби за итни случаи се веќе на терен и почнаа да им помагаат на луѓето. Сите информации за повредените се утврдуваат“, додаде тој. „Досега знаеме за најмалку 30 жртви. Прелиминарните извештаи покажуваат дека на местото на нападот имало и персонал и патници“.
A savage Russian drone strike on the railway station in Shostka, Sumy region. All emergency services are already on the scene and have begun helping people. All information about the injured is being established. So far, we know of at least 30 victims. Preliminary reports… pic.twitter.com/ZZoWfPmpL5
— Volodymyr Zelenskyy / Володимир Зеленський (@ZelenskyyUa) October 4, 2025
Регионалниот гувернер, Олег Григоров, изјави дека е погоден воз што се движел кон Киев и дека медицински лица и спасувачи се на местото на настанот. И Зеленски и гувернерот објавија фотографии од местото на настанот на кои се гледа запалениот патнички вагон.
Шефицата на локалната окружна администрација, Оксана Тарасјук, изјави за украинската јавна телевизија дека околу 30 лица се повредени во нападот.
Москва ја засили својата кампања на воздушни напади врз железничката инфраструктура на Украина во последните месеци, таргетирајќи ја речиси секојдневно. Главниот помошник на Зеленски, Андриј Јермак, ја обвини Русија за намерно таргетирање на станицата и возот, велејќи дека води „војна против цивилите“.
Инцидентот се случи само еден ден по нападот што официјалните лица го опишаа како најголем удар врз украинските постројки за природен гас од почетокот на целосната инвазија во февруари 2022 година.