Rezvani го претстави својот нов модел наречен Knight, кој е базиран на Lamborghini Urus.
Rezvani вели дека станува збор за „воено инспириран пристап“ кон италијанскиот SUV со високи перформанси, кој ќе биде произведен во само 100 единици и ќе биде достапен со и без оклопна заштита, вклучувајќи непробојно стакло, гас-маски и системи за заштита од чад.
Knight продолжува таму каде што застанаа претходните креации на Rezvani, имено Tank и Vengeance. Компанијата ќе соработува со клиентите за да создаде идеален ентериер за нив со избор од пет модели на седишта од кожа Nappa.
Виткиот Knight задржува многу од стандардните дизајнерски елементи на Urus, а корените на Lamborghini се најочигледни во задните светла и целокупната силуета.
Ова е прв пат Rezvani да го користи својот „Mad Max третман“ за италијански автомобил, бидејќи претходно користел американски теренски возила како Cadillac Escalade и Jeep Wrangler како база.
Телото е „надуено“ за да се направи простор за оклоп инспириран од војската, а моделот донекаде потсетува на LM002. Исто така, има истакнат спојлер, кој е поставен на задната врата.
Urus сега има 22-инчни бандажи со 33-инчни теренски гуми. Дополнително LED осветлување е инсталирано на покривот, а дополнителни светла има и на хаубата, кои потсетуваат на оние што се користат за Huracan Sterrato.
Иако Rezvani е познат по оклопните возила што можат да спасат животи на патниците, клиентите ќе мора да го изберат Dark Knight пакетот ако сакаат непробојно стакло и оклоп, заштита на подвозјето од експлозиви и гуми што овозможуваат возење дури и по дупчење.
Dark Knight е опремен со систем за завеса од чад, засилена суспензија и систем на камери за ноќно гледање со термички сензори. Опциите вклучуваат стробоскопски светла, сирени, гас-маски, панцири и шлемови.
Овој пакет вклучува електрифицирани рачки на вратите, заслепувачки светла, челичен браник и диспензер за бибер спреј.
Колку е потежок модифицираниот Urus од основниот модел сè уште не е познато. Сепак, во соопштението се споменуваат карбонски панели, но не е јасно дали тие се дел од пакетот Dark Knight.
Како и да е, Rezvani ветува забрзување од 0 до 100 км/ч за 3 секунди. SUV-от е напојуван од 4,0-литарски двоен турбо V8 мотор, кој развива околу 800 КС.
Цената за конверзија е најмалку 149.000 долари и не важи за самиот Urus и пакетот Dark Knight.