Американските медиуми пишуваат дека компанијата Fisker „живеела неуреден и краток живот“, па „не е изненадување што оставила хаос зад себе“. Документите од судот открија што пронашле сопствениците на зградата во поранешната централа во Ла Палма, Калифорнија.
Изнајмувањето на огромната зграда го чинеше Fisker повеќе од 80.000 долари месечно, а компанијата таа сума ја двоела од 2022 година. Меѓутоа, откако автомобилскиот производител банкротираше, сопствениците на зградата, Shamrock Properties, ја презедоа контролата на 27 септември. Нивниот претставник извршил увид и утврдил дека зградата е „оставена во целосен неред“ и нашол многу ѓубре. Во документацијата стои дека „личниот имот е напуштен“, а зградата изгледа неуредна, како да е вандализирана.
Бесни се во Shamrock бидејќи се соочуваат со чистење што ќе чини десетици илјади долари, вклучително и поправка на штетата и отстранување на „опасниот материјал“. Зградата содржи големи буриња, разни хемиски шишиња и приближно 20 батерии со големина на автомобил.
Иако ова би било непријатна ситуација за типичен закупец, работите се многу покомплицирани поради банкротот на Fisker. Heritage Global Partners ги контактираше на 12 септември, наведувајќи дека купиле одреден имот во објектот, но ништо не беше откриено, па Shamrock не знае кој што оставил. Исто така, на паркингот се оставени и автомобили Fisker.
Сето горенаведено е само дел од документацијата, а претставникот на Shamrock тврди дека имало „лудо брзање“ додека луѓето се обидувале да ги зграпчат работите во последен момент. Тој на 27 септември гледал како луѓето набрзина го отстрануваат имотот од зградата и товарат разни работи во возилата и дека не ни знае кои се тие. Фрлале ѓубре насекаде, земале алатки, компјутери, автоделови итн.
Овој хаос го потврдуваат и фотографиите од зградата, на кои се гледа разновиден отпад, напуштен канцелариски мебел, делови за автомобили, па дури и глинест прототип на кабриолетот Ronin.