По немилиот настан со физичкиот напад врз стручна работничка во Центарот за социјални работи во Прилеп, Институтот за социјална работа и социјална политика при Филозофскиот факултет во Скопје изразува длабока загриженост и ја упатува својата безрезервна поддршка до нападнатата колешка.
Во дописот испратен до Министерството за труд и социјална политика, Институтот остро го осудува насилството врз професионалците кои секојдневно работат со најранливите групи во општеството.
„Бараме итно преземање мерки за подобрување на безбедносните услови за сите вработени во центрите за социјална работа низ државата. Безбедни работни услови се основа за квалитетна и одговорна социјална заштита“, стои во дописот.
Институтот ги повикува институциите, медиумите и јавноста да дадат гласна поддршка и да придонесат кон создавање систем во кој социјалната работа ќе се почитува, а професионалците ќе бидат заштитени и вреднувани.
„Социјалната работа е професија од јавен интерес – достоинството и безбедноста на стручните работници мора да бидат приоритет!“, заклучува Институтот.