Грузија ја одложи својата кандидатура за членство во ЕУ откако Европскиот парламент гласаше за отфрлање на резултатите од неодамнешните избори во земјата.
Премиерот Иракли Кобахидзе ја обвини ЕУ за „уцена“ и рече дека неговата влада ќе се откаже од својата кандидатура за членство „до крајот на 2028 година“.
Одлуката на грузиските власти дојде неколку часа откако европските пратеници повикаа на повторување на минатомесечните парламентарни избори во Грузија, тврдејќи дека има „значителни нерегуларности“.
Изјавата на премиерот предизвика протести во градовите низ Грузија.
Илјадници луѓе се собраа пред зградата на парламентот во главниот град Тбилиси, блокирајќи го сообраќајот и веејќи знамиња на ЕУ.
Од 2012 година, земјата е управувана од партијата Грузиски сон, која критичарите ја обвинуваат дека се обидува да ја оддалечи земјата од ЕУ и да се приближи до Русија.
Партијата тврдеше дека победила на изборите минатиот месец, но пратениците од опозицијата ја бојкотираат работата на новото свикување на парламентот, тврдејќи дека резултатите се фалсификувани, што е став и на претседателката на државата Салома Зурабишвили.
Европскиот парламент во четвртокот ја поддржа резолуцијата која ги опишува изборите како последна фаза од „влошувањето на демократската криза“ во Грузија, обвинувајќи ја владејачката партија дека сноси „целосна одговорност“.
Таа изразила особена загриженост поради извештаите за купување и манипулација на гласови, заплашување гласачи и малтретирање на набљудувачите.
Реагирајќи на ставот на Европскиот парламент, грузискиот премиер Кобахидзе навел дека неговата влада „одлучила да не го стави на дневен ред прашањето за влез во Европската унија до крајот на 2028 година“.
Грузија има официјален кандидатски статус за членство во ЕУ од 2023 година, иако Брисел веќе го запре процесот на пристап на почетокот на оваа година поради контроверзниот закон за „странски агенти“, за кој критичарите велат дека е направен по моделот на Русија, со цел да се дискредитираат организациите обвинети дека „следат интереси на странска сила“.
Кобахидзе посочил дека Грузија ќе продолжи да ги спроведува реформите потребни за пристапување и дека сè уште планира да се приклучи до 2030 година, но додаде дека „од клучно значење е ЕУ да ги почитува нашите национални интереси и традиционални вредности“.
Учествувајќи во протестите на опозицијата, претседателот Зурабишвили ја нарече изјавата на премиерот „последниот чин на државен удар“.
„Патувањето од Европа до Русија, кое започна пред неколку месеци, ако не и порано, заврши денеска“, рече Зурабишвили.
„Ако некој се сомневаше дека тоа можеби не е така, дека може да има друго објаснување, денес сè е отфрлено.
„Оваа нелегитимна влада му објави војна на својот народ, своето минато, својата иднина, нашата иднина, иднината на нашето општество и нашата земја. На овој пат што го избра владата, Грузија нема државност, независност. нема иднина – освен во Русија“, рекла претседателот.
Повеќето западни партнери на Грузија не ѝ честитаа на владејачката партија на изборната победа, барајќи истрага за бројните нерегуларности пријавени од набљудувачите.
Жестоки судири во Тбилиси
Во четвртокот на 28 ноември во Тбилиси во текот на ноќта продолжија судирите меѓу демонстрантите, поддржувачите на ЕУ и полицијата.
Демонстрантите поставија барикади на улиците, додека полицијата употреби бибер спреј и водени топови врз толпата.
Грузиски сон не победи на изборите. „Извршија државен удар“, изјави 20-годишниот Шота Сабашвили.
„Парламентот и владата на Грузија не се легитимни и нема да дозволиме овој самопрогласен премиер да ја уништи нашата европска иднина“, вели тој.
Ана, студентка, истакнала дека Грузиски сон „оди против волјата на грузискиот народ и сака да не влече назад во времето на Советскиот Сојуз.
„Грузискиот народ нема да дозволи тоа да се случи“, рекла таа за „Асошиејтед прес“.