Мадрид не спие 48 часа бидејќи по славењето на шпанската титула на ЕУРО, и синоќешниот дочек, делот кој навива за Реал Мадрид од утрово е на нозе бидејќи новиот „галактико“ Килијан Мбапе и официјално слета меѓу „кралевите“.
Гужва имаше од 07:00 часот кога навивачите се преполнија околу универзитетската болница „Санитас Ла Моралеха“, каде поранешниот играч на ПСЖ пристигна на лекарски прегледи во 08:30 часот. Не се задржа долго бидејќи фокусот на прегледите беше кај оториноларингологот поради скршеницата на носот на ЕУРО.
Потоа, Килијан ја замени белата кошула и шорцевите со елегантен костум, а следуваше официјалното потпишување на петгодишниот договор со Реал и популарната фотосесија со претседателот Флорентино Перез во собата за трофеи во клупскиот музеј.
За тоа време „Мбапеманија“ полека креваше тензија меѓу навивачите иако во 11 часот во главниот град на Шпанија беше 28 степени Целзиусови. Реал за само еден час продаде 80.000 влезници за презентацијата, можеше и повеќе, можете да нарачате дресови со број „девет“ и ќе ги добиете во рок од четири до шест недели бидејќи првите два контингента беа распродадени во пред продажба.
„Сантијаго Бернабеу“ изгледаше кралско, полно со возбуда, како да го чека новиот крал на тимот. Претседателот Флорентино Перез доби овации кога првпат излезе на теренот, а по него легендите Пири и Зинедин Зидан.
„Добредојдовте на овој историски настан. Најпрво, дозволете ми да и честитам на шпанската репрезентација за нивната четврта титула на Европското првенство. Им честитам не само на победата, туку и на начинот на кој ја постигнаа. Задоволство ми е да го претставам нашиот нов играч. Реал е најценетиот клуб во светот, нашите големи ѕвезди Сантијаго Бернабеу, Алфреди Ди Стефано, Хенто, Копа и други, го создадоа митот за Реал Мадрид“, рече Перез и ги покани Пири, почесниот претседател и Зидан на сцената. .
А потоа излезе Килијан Мбапе облечен во дресот со број девет. Овации со илјадници децибели, хистеријата на трибините траеше додека Перез повторно не излезе на збор и го опиша новиот „Галактико“, до секој статистички детал. И тогаш, како и најдобрите фудбалски коментатори, извика „Килијаааан, ембапеееее“.
„Добар ден на сите, ќе се обидам да зборувам на шпански. Неверојатно е да се биде овде, не знам како да ги опишам чувствата. Сонував да играм за Реал долги години и денес мојот сон се оствари. Сакам да благодарам на претседателот Флорентино Перез кој беше со мене уште од првиот ден, им благодарам на сите луѓе кои ме натераа да го видам целото мое семејство како плаче“, беа воведните зборови на Мбапе, кој постојано беше прекинуван од громогласен аплауз додека го бакнуваше дресот.
„Благодарам на навивачите на Реал бидејќи долги години ми покажуваат почит и љубов. Сега имам само еден сон. Ќе го дадам животот за овој клуб и овој грб. Имаме и порака за децата – јас бев дете како вас, со страст и следејќи го својот сон, може да постигнете што сакате. Јас сум горд што сум играч на најголемиот клуб во историјата на фудбалот. Ветувам многу трофеи, сакам да бидам дел од клупската историја. Не ми се верува дека ќе заплачам на крајот. И сега сите заедно: 1,2,3 да живее Реал Мадрид“, ја разгоре Мбапе публиката.
На крајот имаше и мала егзибиција за навивачите, подведување на топката. Спектакл за новиот „Галактико“.