Десетици лица ангажирани со договори за дело во Клиничката болница во Тетово организираа протест поради задоцнети исплати и неиздавање нови договори. Околу 140 медицински сестри, техничари, болничари и административци веќе трет месец чекаат да им се обноват договорите и да им бидат исплатени хонорарите за два месеци. Тие бараат и трајно решение – вработување на неопределено време.
„Работам со договор на дело шест години, а некои колешки и по десет години. Се ветуваат решенија, но до сега нема ништо. Два месеци сме без плата и без договор. Вредно работиме и мислиме дека заслужуваме да ги добиеме ветените права“, рекоа протестантите.
Тие посочуваат дека работеле и за време на пандемијата, но без здравствено осигурување и пензиски стаж, со договори кои често биле склучувани само на два или шест месеци, со прекини. По протестот пред Ургентниот центар, група од нив разговараше со директорот на болницата, Агим Бериша, кој им објасни дека се чека одобрение од Министерството за финансии.
„Направивме се што можеме. Министерството за здравство ни даде зелено светло да продолжиме со договорите од март до крајот на годината, но сега чекаме согласност од Министерството за финансии. Работиме на тоа да добиете плати навреме“, рече Бериша.
Тој додаде дека во Владата се разгледува можноста сите ангажирани со договор на дело да добијат вработување на неопределено време како трајно решение.