Трес Унидос, домородно село на бразилската дождовна шума во Амазон, забрани влез за сите посетители, со надеж дека изолацијата ќе ги заштити од коронавирусот, но тоа не се случи.
Новиот вирус, најверојатно, пристигнал по Рио Негро, огромна река која го поврзува Трес Унидос со најголемиот град на Амазонија, Манаус – оддалечен со брод пет часа.
Реките, кои се од витално значење за овие оддалечени заедници, сега носат и болести. На картата објавена од бразилската влада, потврдената смртност од коронавирус е претставена со точките што ги следат реките во тие оддалечени делови од земјата.
Драмата на 35 семејства на племето Камбеба се повторува во домородните заедници низ Амазон, бидејќи епидемијата се движи нагорно од Манаус, еден од најтешко погодените градови во Бразил, каде единиците за интензивна нега се преполни и се користат масовни гробови за погребување на мртвите.