Не смее да има надворешно мешање во ситуацијата во Белорусија, рече германската канцеларка Ангела Меркел на брифингот по онлајн состанокот на шефовите на држави и влади на ЕУ.
„Белорусија мора да го најде својот пат. Тоа мора да се случи преку дијалог во земјата, не смее да има надворешно мешање “, рече Меркел, додавајќи дека нема сомнение дека изборите во Белорусија не биле фер.
Според канцеларката, лидерите на ЕУ го осудија насилството врз мирољубивите демонстранти во Белорусија, апсењето на илјадници Белоруси и го повикаа режимот на Лукашенко да престане со употреба на сила и слободата на говор и мирен собир да биде загарантирана.
Меркел додаде дека сите уапсени мора да бидат ослободени без услови и дека лидерите на ЕУ се за национален дијалог, како што е предложено од опозицијата во Белорусија.
Таа истакна дека ОБСЕ мора да биде вклучена во решавањето на политичката криза во таа земја.
Канцеларката истакна дека се обидела да организира телефонски разговор со белорускиот лидер Александар Лукашенко, но без резултати.
„Јас лично се обидов да организирам телефонски разговор со претседателот Лукашенко, но за жал, тоа не се случи. Побарав и телефонски разговор со претседателот Путин и, како што знаете, разговорот се одржа“, рече Меркел.