Германската канцеларка Ангела Меркел се соочува со зголемен притисок за завршување на изградбата на гасоводот „Северен поток 2“, откако германските лекари неделава потврдија дека рускиот опозициски политичар Алексеј Навални е отруен од Новичок, истиот нервен агенс од воена класа, користен во нападот на поранешниот руски шпион Сергеј Скрипал.
Зелената партија, која во моментов е втора на анкетите по Демохристијанската унија на Меркел (ЦДУ), ја повика канцеларката да престане со изградбата на скоро завршениот нафтовод од Русија до Германија како начин за казнување на Москва.
„Овој отворен обид за атентат од мафијашката структура на Кремљ не само што треба да нè загрижува, туку мора да има и вистински последици“, рече Кетрин Горинг-Екарт, претставник на Зелените во Бундестагот.
Повикот го повторија дури и некои членови на ЦДУ, пренесува „Форин полиси“.
– Единствениот јазик што го разбира Владимир Путин е остриот јазик. Мораме да одговориме на тој јазик – рече Норберт Ротген, член на Конзервативната партија и шеф на парламентарниот комитет за надворешни работи, кој долго време беше отворен противник на заедничкиот проект на Германија и рускиот нафтен гигант „Гаспром“.
Навални беше пренесен во болница во Берлин минатиот месец откако одеднаш му се слоши на летот од Сибир за Москва. Во моментов се наоѓа во вештачка кома и е во стабилна, но критична состојба. Германската влада во средата објави дека непријателот на Путин е затруен од „Новичок“, потенцијално смртоносен нервен агенс развиен во советските лаборатории.
По оваа потврда од германските лекари, претседателот на германските социјалдемократи (СПД), Норберт Валтер-Борјанс, стартуваше „натпревар за идејата какви санкции да се воведат на Русија“.
Проектот „Северен тек 2“ веднаш беше наметнат таму, кој треба да испорача природен гас за пазарот на ЕУ од едно пристаниште близу Санкт Петербург, преку Балтикот, до едно пристаниште на крајниот северо-исток на Германија, веќе следната година. Зад проектот главно стои руската државна компанија „Гаспром“.
– Ако сега го завршиме проектот за гасоводот „Северен тек 2“, тоа не само што ќе биде максимална потврда и поддршка за Владимир Путин да продолжи со оваа политика, туку и награда за него – рече Ретген, кој исто така е еден од кандидатите за наследник на Меркел.
Претседателот на Либерално-демократската партија (ФДП), Кристијан Линднер, оцени дека проектот „Северен тек 2“ е „неодржлив“.
– Режимот што организира убиства со труење не треба да биде партнер за големи проекти, а тоа се однесува и на проектите за гасовод – рече тој.
Ситуацијата во никој случај не е едноставна за Меркел. Таа упорно го бранеше проектот до минатата недела, па дури и минатиот петок, кога Навални веќе беше префрлен во берлинската болница, повтори дека мора да се заврши. Некои велат дека тоа е затоа што местото каде гасоводот влегува во Германија е во нејзиното изборно тело, а тоа е во делот на земјата каде секоја работа е добредојдена.
Меркел има цврст став кон Русија веќе подолго време и се обидува да го задржи унифицираниот став на Европската унија за санкциите против Москва поради анексијата на Крим во 2014 година. Во исто време, Германија е исклучително свесна за потребата од одржување на конструктивен дијалог со Русија за итни меѓународни прашања како што се војните во Украина и Сирија и спиралната во Либија.
„Северен тек 2“ долго време беше предмет на контроверзии од двете страни на Атлантикот. Досега канцеларката успешно го бранеше проектот од нападите на Белата куќа, бидејќи од кога дојде Доналд Трамп на власт, Вашингтон вршеше огромен притисок врз сите страни вклучени во изградбата на гасоводот со цел саботажа на проектот. Тоа, на крајот, би значело повеќе американски гас за пазарот на ЕУ.
Досега германската канцеларка не беше сама во одбрана на тоа од самиот почеток на контроверзниот проект, потсетува „Дојче веле“. Помалиот коалициски партнер во владата, социјалдемократите, стојат зад проектот од самиот почеток. Едно од најважните лица во таа руско-германска соработка е Герхард Шредер, поранешен социјалдемократски канцелар и голем пријател на Владимир Путин, кој беше назначен за шеф на надзорниот одбор во 2016 година.
„Њујорк Тајмс“ претставува интересна опција што ќе и овозможи на Меркел да го отстрани притисокот од Вашингтон, таа би можела да ја запре изградбата на „Северен тек 2“ и да ја обвини Москва за сето тоа. Сепак, анализата исто така претпоставува дека тоа нема да се случи од повеќе причини.
Едната е очигледно економска, поради зависноста на ЕУ од рускиот гас, додека другата е од политичка природа. И покрај сите сегашни кризи, од кои последната во Белорусија, Берлин и Брисел се грижат да имаат некој во Москва со кого можат да разговараат. „Њујорк тајмс“ потсетува на многу други политички атентати кои наводно биле оркестрирани од Кремљ и околу кои имало бучава во медиумите – но на крајот немале никакви последици за односите меѓу Москва и Берлин.