Започнува процес во Лондон што може да ја запечати судбината на Џулијан Асанж, човекот што ги откри американските воени злосторства на светот. Ако биде испорачан во САД, скоро сигурно ќе се соочи со доживотен затвор, пишува ДВ. 
Од десетината затвори во Лондон, британското судство го избрало Белмарш за Асанж. Тоа е затвор со високи безбедносни мерки на истокот од главниот град и всушност направен за терористи и сериозни криминалци. Условите во затворот се лоши – дури и на Википедија пишува дека Белмашр е „британски Гвантанамо“.
Основачот на платформата Викиликс ќе биде однесен во судницата на Централниот суд во Лондон. Таму, во следните три недели, ќе се реши неговата судбина: дали тој ќе биде екстрадиран во САД врз основа на обвинение од осумнаесет точки? Во Америка му се заканува да биде осуден на 175 години затвор.
Пратеничката од германската левица Хајке Хензел отпатувала за Лондон за да го следи сослушувањето. Таа вели дека станува збор за „политички процес против истражувачки новинар“, како што го нарекува Асанж. Што е уште полошо, додава Хензел, Асанж е прогонуван од страна на САД екстериторијално, иако дејствувал од Европа.
Кристијан Мир, раководителот на „Репортери без граници“, вели дека Џулијан Асанж „го трасирал патот, покажувајќи како новинарството треба да управува со големи количини на податоци“. Асанж, вели Мир за ДВ, иницирал објавување на податоци од големо значење за светската јавност. „Затоа Репортери без граници бескомпромисно се залагаат за Џулијан Асанж“.
Помалку права од воените злосторници во Хаг
Мир ќе има и во судницата во Лондон. Сепак, пристапот до јавноста е ограничен таму и не е сигурно дека ќе има место за него во публиката. Тоа нема многу врска со правилата за растојание за време на пандемијата. Бидејќи, Мир бил присутен за време на првиот круг на сослушувања во февруари и, како што рече, бил шокиран што во Лондон не покажале интерес да им овозможат на меѓународните невладини организации или пратениците да го следат процесот.
„Асанж беше присутен таму во стаклена кабина. Тој имаше тешкотии да контактира со неговиот адвокат за време на постапката, што е правен предуслов квалитетно да се следи постапката“, вели Мир.
Но, во случајот на Асанж, владеењето на правото не се применува, вели Нилс Мелцер, специјален претставник на ООН за проблемот со тортура и сурово казнување. „Работите што се подразбираат и ги уживаат дури и најлошите воени злосторници на кои им се суди во Хаг, на пример, му се одземени на Асанж: тој нема контакт со американски адвокати, неговиот контакт со британските адвокати е многу ограничен и скоро нема пристап до правни документи“.
Мелцер, швајцарски адвокат кој предава на Универзитетот во Глазгов, изјавил за ДВ: „Ова се исклучително сериозни процедурални прекршувања за кои не постои неопходност или оправдување“.
Дури и додека Асанж бил приведен во еквадорската амбасада во Лондон, му било повредено правото доверливо да комуницира со неговиот адвокат. Ова е познато по судењето во Мадрид против Дејвид Моралес, сопственикот на безбедносната компанија УЦ Глобал. Таа компанија обезбедувала безбедност на еквадорската амбасада во Лондон, но всушност ја шпионирала за потребите на американски клиент.
Џулијан Асанж е на удар на критичарите затоа што Викиликс објави неколку илјади хакирани електронски пораки поврзани со кампањата на Хилари Клинтон, неколку недели пред изборите во 2016 година.
Тој ги негира обвинувањата на американските обвинители дека Викиликс ги добил документите од руски хакери. Ова прашање не е дел од правниот процес.
Асанж се најде на светските насловни во 2010 година кога Викиликс објави американско воено видео од нападот со хеликоптер Апачи од 2007 година во Багдад, во кој загинаа десетина луѓе, вклучувајќи и двајца вработени во Ројтерс.
Неговиот правен тим во Лондон тврди дека американските обвинувања против него се политички мотивирани и претставуваат закана за слободата на медиумите.