Портпаролот на Кремљ, Дмитриј Песков изјави дека веројатно има недоразбирање во врска со „одредени формулации“ во постот на Марија Захарова и посочи дека односите меѓу Србија и Русија се од стратешки карактер, но исто така и дека Србите се братски народ за Русите.
Дмитриј Песков изразува надеж дека никој нема да се сомнева во посветеноста на Русија и длабокото почитување на Србија.
„Можно е да имало недоразбирање во врска со одредени формулации, но знам дека мојата колешка Марија Захарова се извини. Затоа, претпоставувам дека никој нема да се сомнева во посветеноста и длабокото почитување што го имаме за Србија како целина и за раководството“, рече Песков, пренесе ТАСС.
„Нашите пријателски, партнерски односи и стратешкото партнерство со Србија се еден од приоритетите на нашата надворешна политика. Српскиот народ е братски народ и апсолутно сите, без исклучок, руското раководство, експертите и академиците се посветени на развојот на нашето партнерство“, рече тој.
Песков исто така наведува дека Министерството за надворешни работи на Русија работи на развој и продлабочување на односите меѓу Русија и Србија, меѓу другото, со цел „заштита на интересите на братскиот српски народ на меѓународната сцена“.
На прашањето дали е потребно регулирање на активностите на дипломатите на социјалните мрежи со воведување на одредени етички кодекси, Песков одговори дека активноста на руските дипломати на социјалните мрежи е неопходен и составен дел од нивната работа.
„Тешко е да се дефинираат такви кодекси. Се разбира, потребно е да се обрне посебно внимание дали формулациите се точни, за да се избегнат недоразбирања“, заклучи портпаролот на Кремљ.