Шефот на руската служба за надворешни разузнавачки служби, Сергеј Наришкин, рече дека Москва нема складиран „новичок“, агенс кој, според Германија, го отрул рускиот опозиционер Алексеј Навални.
Магацините „беа уништени во согласност со протоколот и прописите на Организацијата за забрана на хемиско оружје“, рече Наришкин, додавајќи дека сите други тврдења се „дезинформации“.
Според руските агенции, Наришкин исто така уверил дека „немало токсична супстанца во телото на Алексеј Навални кога тој ја напуштил руската територија“, проценувајќи дека Русија „има многу прашања за германската страна во врска со тоа“.
Портпаролот на Кремљ, Дмитриј Песков изјави дека Москва не ги добила здравствените податоци на Навални од Берлин.
Навални, кој открива корупција на врвот на раководните руски структури, беше примен на одделот за интензивна нега во болницата во Омск на 20 август, бидејќи одеднаш му се слоши.
Два дена подоцна, тој беше пренесен во Германија, каде што лекарите заклучиле дека бил отруен со нервен агенс „новичок“, кој датира уште од времето на Советскиот Сојуз.
Руските власти во неколку наврати негираа вмешаност во случајот.
Навални денеска објави порака и негова слика на Инстаграм, во кои се наведува дека може да дише без респиратор цел ден, во првиот пост преку таа мрежа по труењето на крајот на август.