Соединетите држави денес го потврдија продолжувањето на договорот Нов СТАРТ за контрола на нуклеарно оружје на пет години, што Русија веќе го потпиша, изјави американскиот државен секретар Ентони Блинкен.
„Претседателот Бајден вети дека ќе го заштити американскиот народ од нуклеарни закани со повторно воспоставување на американското лидерство во контролата на оружјето и неширењето на распространетоста на оружјето“, се додава во соопштението
На 29 јануари, рускиот претседател Владимир Путин потпиша продолжување на тој договор.
„Денес, САД го прават првиот чекор во исполнувањето на тоа ветување со продолжување на договорот Нов СТАРТ со Руската Федерација за пет години“, изјави Блинкен.
Новиот СТАРТ истекува на 5 февруари. По стапувањето на функција на 20 јануари, Бајден предложи продолжување на договорот за пет години, што Кремљ веднаш го поздрави.
Според договорот Нов СТАРТ потпишан во 2010 година од тогашните претседатели на САД и Русија, Барак Обама и Дмитриј Медведев, на двете страни им е дозволено да имаат максимум 1.550 распоредени нуклеарни боеви глави и 700 распоредени ракети и бомбардери, кои се проверуваат со инспекции.
Нов СТАРТ е единствениот преостанат договор за контрола на нуклеарното вооружување меѓу САД и Русија, откако најпрво САД и Русија се повлекоа од Договорот за нуклеарни сили со среден дострел (INF) од 1987 година.