„Ова е скандалозна невистина. Нашиот степен на усогласеност со заедничката надворешна и безбедносна политика на ЕУ, според последниот извештај на Европската комисија (октомври 2020) за 2019 изнесува 92%: “On common foreign and security policy (CFSP), the country aligned – when invited – with 84 out of 91 High Representative declarations on behalf of the EU and Council Decisions, representing an alignment rate of 92% in 2019.”, реагираше вицепемиерот задолжен за европси прашања, Никола Димитров на изјавата на неговата бугарска колешка, Екатерина Захариева.
„Очигледно е потребна поголема внимателност, особено кога се работи за лесно достапни податоци. Вака впечатокот е разочарувачки – дека идејата била паушално да се оцрни соседот, што не би било ниту пријателски, ниту европски.“, истакна Димитров.
Претходно шефицата на бугарската дипломатија, изјави дека Северна Македонија е една од овие земји со исклучително низок процент, под 50 отсто, на усогласеност со заедничката надворешна политика на ЕУ.
„Србија, исто така, е една од оние земји со помал процент, но не толку низок како Република Северна Македонија“, тврди Захариева, посочувајќи дека Албанија има прилично висока стапка на усогласеност во областа на надворешната политика со ЕУ.
Захариева додаде дека е важно овие земји да се реформираат и да одлучат дали ќе бидат сојузници на НАТО и дали ќе бидат членки на ЕУ, а не еден од нејзините соседи.
„Во интерес на Бугарија е Северна Македонија да оди по патот на зачленување (во ЕУ), но да биде искрена и не само со зборови. Се обидуваме да ги намалиме тензиите“, изјави Захариева за БНР.