Водачите на Европската унија во четврток ќе одржат виртуелен состанок на кој ќе разговараат за забрана за извоз на вакцината АстраЗенека во Велика Британија, но, според Би-Би-Си, британскиот премиер Борис Џонсон прво ќе го претстави случајот во телефонски разговори „еден на еден“.
Претседателката на Европската комисија, Урсула фон дер Лајен, рече дека ЕУ може да „забрани“ испраќање на вакцини што биле произведени на нејзина територија во Велика Британија. Сепак, еден министер на британската влада велидека е од суштинско значење ЕУ да ги исполни своите обврски. Даунинг стрит соопшти дека Лајен му порачала на Цонсон претходно оваа година дека ЕУ нема намера да го ограничи извозот на вакцини. Британскиот министер за здравство и социјална помош, Хелен Вејтли, апелираше до ЕУ да ја почитува оваа обврска и предупреди на „национализам за вакцинација и протекционизам“.
Портпаролот на Европската комисија Ерик Мејмер изјави дека Брисел не се обидува да забрани извоз на вакцини, но сака фармацевтските компании да ги исполнат своите обврски од договорот кон европскиот блок.
„Во тој контекст, претседателот рече, се разбира, дека всушност гледаме дека компаниите што произведуваат вакцини во ЕУ ги извезуваат широко, што е добро само по себе, но дека сакаме реципроцитет и пропорционалност во тој извоз“, потенцира Мејмер.
Во телефонските разговори, премиерот Џонсон се очекува да ги убеди европските лидери да стават вето на секој предлог што ќе спречи вакцините што се извезуваат да стигнат до Велика Британија. Според агенциите, на врвот на листата се францускиот претседател Емануел Макрон и германската канцеларка Ангела Меркел.
Најновите искри избувнаа во врска со дозите произведени во холандската фабрика. Европските лидери се исто така мета на критики поради бавната имунизација на континентот.
Според БиБиСи, досега се вакцинирани помалку од 12 проценти од европската популација, во споредба со скоро 40 проценти од населението на Велика Британија. ЕУ се соочува со проблеми во производството на вакцините Фајзер / Бионтек, Модерна и Оксфордската/АстраЗенека.