Светската здравствена организација (СЗО) во петокот објави дека веднаш и требаат десет милиони дози вакцини против „Ковид-19“ за да им помогне на земјите кои ја немаат, односно 20 на број, и ја повика меѓународната заедница да ја донира вакцината.
Меѓународниот систем „Ковакс“, координиран од СЗО заедно со другите партнери, „итно има потреба од десет милиони дози на вакцината, така што „овие дваесет земји можат да започнат да ги вакцинираат своите здравствени работници и стари лица во следните две недели“, рече на прес-конференција Генералниот директор на СЗО – Тедрос Аданом Гебрејесус.
„Постојат многу земји кои можат да си дозволат да донираат одредена количина вакцина без минимално нарушување на нивните сопствени планови за вакцинација“, рече тој, предупредувајќи: „Десет милиони дози не се многу и далеку од доволно, но ова е само почеток, бидејќи ќе ни требаат стотици милиони дополнителни дози во следните месеци“.
На почетокот на оваа година, шефот на СЗО на глобално ниво повика на вакцинирање на негуватели и стари лица во сите земји во светот во првите сто дена од 2021 година.
Тедрос рече дека вакцинирањето започнало во 177 земји до денес, особено благодарение на „Ковакс“, преку кој се дистрибуирани повеќе од 32 милиони дози на вакцина во 61 земја.
„До 100-тиот ден од оваа година, ни преостанаа 15 дена, а дури 36 земји сè уште чекаат на вакцината за да можат здравствените работници и старите лица да започнат да се вакцинираат таму“, рече тој. „Очекуваме шеснаесет од споменатите 36 земји да ја примат првата доза на вакцина во следните две недели, но останатите дваесет сè уште чекаат.
„Ковакс е подготвен да ги испорача, но не можеме да доставиме вакцина што ја немаме“, рече Тедрос.
„Како што знаете – билатералните договори, забраните за извоз, дипломатијата за вакцини и национализмот за вакцините го нарушија пазарот, носејќи недвосмислени нееднаквости помеѓу понудата и побарувачката“, рече Тедрос.
Оваа година, меѓународниот систем Ковакс сака да ја достави вакцината на 20 проценти од населението од скоро 200 земји и територии, што вклучува механизам за финансирање за помош на деведесет и две загрозени земји.