Веројатно сте чуле дека додавањето јаболков оцет во вашата дневна исхрана ќе ви помогне да изгубите тежина. Дали во тоа има вистина?
Голем број истражувања за врската помеѓу оцетот и слабеење се прават на животни, главно глувци и стаорци. Студиите покажуваат дека оцетната киселина, главната компонента на јаболков оцет, може да ја намали акумулацијата на телесните масти и метаболичките нарушувања кај дебелите стаорци. Но, се разбира, глувците се луѓе, така што овие откритија покажуваат малку.
Студиите врз луѓе биле мали, што ја ограничува нивната валидност.
Најпознатото истражување на оваа тема е направено во 2009 година и вклучува 175 јапонски испитаници со прекумерна тежина, на возраст од 25 до 60 години, кои биле поделени во три групи.
Во периодот од 12 недели, групите секојдневно консумирале пијалок со една лажица оцет, две лажици оцет или без оцет. На крајот од три месеци, оние кои консумирале која било количина оцет имале помала телесна тежина, помалку висцерални маснотии, помал обем на струкот и пониски нивоа на триглицерид од плацебо групата која не пиела оцет.
Меѓутоа, оние кои испиле оцет изгубиле само еден до два килограми повеќе од плацебо групата. Повеќето диети даваат многу подобар резултат.
Нутриционистката Керол Џонсон ги проучува ефектите на оцетната киселина врз нивото на гликоза во крвта кај дијабетичарите уште од 2004 година. Таа забележа дека тоа навистина влијае на контролата на шеќерот во крвта, особено кај преддиабетичарите.
Иако верува дека наодите од јапонската студија имаат смисла затоа што се во согласност со истражувањето на животни, таа посочува дека моќта на оцетот при слабеењето е многу скромна.
Ако одлучите да додадете оцет во вашата диета, Џонсон препорачува тоа да биде една лажица оцет додадена во полна чаша вода. Правилното разредување на оцет е клучно. Во спротивно, може да ги оштети забите, грлото и гастричната слузница.
Нутриционистката не гледа ништо лошо во користењето оцет за контрола на шеќерот во крвта после јадење. Овој оцет е исто така дел од медитеранската диета, поврзана со здравјето на срцето и други придобивки.
„Дури и кај здрави луѓе, зголемувањето на шеќерот во крвта после оброк е фактор на ризик за срцеви заболувања, па според мое мислење, секој треба да ги искористи придобивките што може да ги обезбеди оцетот. Она што јас би го препорачала е додавање оцет во јадењата како зачин, бидејќи не содржи калории“, изјави Џонсон за Си-Ен-Ен.