Во првиот говор во Собранието, новата претседателка на Косово, Вјоса Османи, им се заблагодари на граѓаните и пратениците за изборот, велејќи дека е исполнета волјата на граѓаните изразена на изборите на 14 февруари.
Османи беше избрана за петгодишен мандат во третиот круг на гласање со 71 глас од 82 пратеници кои учествуваа во гласањето. Имаше 11 неважечки ливчиња.
Откако положи заклетва и интонирањето на химната на Косово, Вјоса Османи во својот говор вети дека ќе работи на зајакнување на државата, владеењето на правото, заштита на секој сантиметар од земјата и дека ќе биде претседател на сите.
Истакна дека нејзиниот избор за претседател е најдобриот показател дека жените можат да успеат и дека ќе ги поддржува жените со сите можности и целото свое битие.
Таа рече дека Косово има уште многу работа, со цел да се надминат последиците од војната и да се развие државата. Таа истакна дека не треба да се оди подалеку од собраниската сала за да се види колку страдал косовскиот народ.
Ја спомена пратеничката Васфија Красниќи, жртва на силување во војната, заменик претседателот на косовското собрание Саранда Богујевци, која го преживеа масакрот на своето семејство во Подуево, министерката за надворешни работи Доника Грвала, ќерка на јунакот Јусуф Грвала убиен во Германија, премиерот Албин Курти, поранешен политички затвореник и други кои се бореле за слободата на Косово.
Се сети и на идеолошкиот творец на државата Косово, Ибрахим Ругова, легендарниот командант на Ослободителната војска на Косово, Адем Јашари и сите други кои се жртвувале за денешно Косово.
Посочи дека главните столба на државата Косово се САД, Европската унија и Велика Британија и Република Албанија, со кои Косово има посебни природни односи.
„Нашата приказна е, покрај болката, и приказна за надежта и победата над злото. На тоа патување имавме постојана поддршка од многу наши пријатели. Ние ќе им бидеме вечно благодарни на оние кои застанаа на страната на Косово во потрагата по слобода и независност, но исто така застанаа покрај нас како дел од државата Косово. Денес ги замолуваме да бидат со нас во нашите заеднички цели за брза интеграција во евро-атлантските структури, економски развој, гарантирање на еднаквоста и целокупниот просперитет на земјата“, рече Османи.
Новоизбраниот претседател ги повика сите политички партии да соработуваат во градењето на земјата, осигурувајќи дека Косово е држава на своите граѓани и дека различноста на мислењата е вредност.
„Дијалогот е навистина патот напред, но тој мора да биде фер и еднаков. Мир ќе биде постигнат кога Србија ќе се покае, кога ќе се побара извинување од неа и кога ќе се добие правда за оние кои страдаа од нивните злосторства“, нагласи Османи.
Османи рече дека пандемијата КОВИД-19 треба да биде приоритет бидејќи досега се изгубени многу животи.
Им се заблагодари на сите пратеници, особено на Демократскиот сојуз на Косово, нејзината поранешна партија, што и овозможи избор.