Европската агенција за лекови (ЕМА) денес соопшти дека оние кои ја примиле првата доза на вакцината „АстраЗенека“ против Ковид-19, треба да ја добијат втората, и покрај реткиот ризик од згрутчување на крвта.
Во новите упатства, регулаторот за лекови на ЕУ рече дека луѓето треба да продолжат со втората доза на „АстраЗенека“ четири до 12 недели по првата вакцина.
Агенцијата соопшти дека не е познато дали ризикот од редок тромб по втората доза може да биде различен од оној предизвикан од првата вакцинација.
Во анализата на податоците од цела Европа за вакцинацијата со „АстраЗенека“, ЕМА изјави дека нема доволно информации за тоа кој е поподложен на формирање на невообичаени тромбови.
Претходно овој месец, ЕМА соопшти дека постои „можна врска“ помеѓу вакцината „АстраЗенека“ и ретките нарушувања на коагулацијата на крвта, но дека придобивките од вакцинацијата ги надминуваат ризиците.
ЕМА претходно изјави дека згрутчувањето на крвта е „многу редок“ несакан ефект и посочи дека тоа треба да биде наведено и на етикетите.
Сè уште не е утврдено точно колку често се појавуваат ретки тромбови. Според податоците на Велика Британија, која ја користела вакцината најмногу од сите земји, на крајот на март имало 30 вакви случаи меѓу 18 милиони вакцинирани.
Минатиот месец, повеќе од десетина земји, претежно во Европа, престанаа да користат АстраЗенека поради проблеми со згрутчување на крвта.
Откако ЕМА издаде препорака дека може да продолжи да се користи, повеќето земји започнаа да ја користат повторно, но воведоа ограничувања за возраста, само за граѓаните над 60 и 65 години, соодветно, во зависност од земјата.
Агенцијата неделава идентификуваше слична можна врска помеѓу згрутчувањето на крвта и вакцината развиена од „Џонсон и Џонсон“. Како и со „АстраЗенека“, ЕМА соопшти дека треба да се додаде предупредување за формирање невообичаени тромбови во етикетата на вакцината, но посочи дека придобивките од вакцинацијата ги надминуваат ризиците.