“По цели 25 години армиските специјалци добија нова комплетна алпинистичка опрема. Четврт век никој не инвестирал во оваа важна компонента на нашите специјални сили која е подеднакво важна и за вежбање на воени операции на непристапен карпест терен, и за операции за евакуација и спасување на цивили на тежок и опасен терен каде не може да се стигне со традиционален транспорт”, рече денеска министерката Радмила Шекеринска на промоцијата на новата алпинистичка опрема која ќе ја користат дел од припадниците на Баталјонот за специјални сили.
Промоцијата се одржа на полигонот за воена алпинистика во близина на Демир Капија, при што во рамки на презентацијата беше изведена и воена вежба за спасување на загрозени граѓани на планински карпест врв. На вежбата беше прикажана новата опрема, а беа вклучени и воени хеликоптери за воздушна евакуација и транспорт.