Турскиот претседател Реџеп Таип Ердоган повика на воведување меѓународни санкции кон Израел со цел да се запре „масакрирањето“ на Палестинците.
„Ако меѓународната заедница не го санкционира Израел за злосторства против човештвото, Палестинците ќе продолжат да бидат масакрирани“, рече Ердоган во телефонскиот разговор со папата Франциск.
Ердоган веќе неколку дена разговара со странски лидери и достоинственици во обид да ја запре големата израелска офанзива во Појасот Газа.
Од 10 мај, 197 Палестинци се убиени, вклучувајќи најмалку 58 деца, а повеќе од 1.200 лица биле повредени. Од израелска страна загинаа 10 лица, вклучително и едно дете, а 294 лица беа ранети по ракетирање од правец кон Газа.
Според турското претседателство, Ердоган рече дека „израелскиот окупатор, кој го блокира пристапот до џамијата ал-Акса и црквата на Светиот гроб (во источен Ерусалим), убива невини цивили на палестинска земја“.
„Ова варварство ја загрозува и регионалната безбедност“, рече тој.
Во неделата, Папата предупреди на „спирала на смрт и уништување“ во конфликтите на Блискиот исток, оценувајќи дека загубите на невини животи се „ужасни и неприфатливи“.