Европската унија денес го негираше постоењето на документот што се појави во приштинските медиуми во саботата, а портпаролот на ЕУ Питер Стано изјави дека станува збор за „фалсификат“.
Стано за „Kлан Косова“ изјави дека таков документ не дошол од Брисел.
„Ние обично не ги коментираме извештаите на медиумите во врска со наводни документи на ЕУ. Во конкретниот случај, документот е целосен фалсификат и ЕУ никогаш не напишала такво нешто“, рече Стано.
Наводниот внатрешен работен документ на Европската служба за надворешни работи (ЕЕАС), изработен по неодамнешната вечера на министерот за надворешни работи на ЕУ, Жозеп Борел со лидерите на Западен Балкан, што во саботата, меѓу другото, беше проверен од приштинскиот портал „demokracia.com“ наведува дека Борел ќе ги покани властите во Приштина да се воздржат од каква било провокативна акција во општините на северот на покраината.
„Поточно, г. Курти ќе се советува да не презема никакви полициски активности насочени кон собирање сметки за електрична енергија во северните општини, што може да предизвика дополнителни тензии со локалното население“, се вели во документот, кој го разгледал приштинскиот портал.