Сопственичката на салонот „Мадеро центар“, Олгица Маркановиќ, била уапсена денес на хрватската граница, откако група мажи и жени поднеле тужба против неа во март годинава поради обвинувања дека таа ги осакатила со третман на лице.
По наредба на дежурен заменик-јавен обвинител на Првото основно јавно обвинителство во Белград, таа била задржана во притвор во траење до 48 часа поради постоење основи на сомнение дека сторила кривично дело – тешко дело против здравјето на луѓето, надрилекарство и неовластено ангажирање во одредени активности.
Уапсената жена работела во Бања Лука и Белград.
Корекција на носот, затегнување на очните капаци, отстранување на брчките се само некои од третманите со кои осомничената Олгица Маркановиќ наводно осакатила најмалку 11 лица.
На социјалните мрежи кружат страшни фотографии од красти и лузни, а направени се по таканаречените бразилски естетски зафати чија цена се искачувала до 1.200 евра.
-Врз основа на фотографиите и сведоштвата на пациентите, може да се види дека со уредот се постапувало крајно непрофесионално. Може да се види дека наместо оние мали прецизно дефинирани штети, беа предизвикани изгореници од трет степен на кожата и топење на ‘рскавицата, што доведува до трајни лузни и деформации, раскажува за српските медиуми д-р Срѓан Продановиќ, доктор по естетска и анти-стареечка медицина.
Експертите за козметичка хирургија велат дека третманите треба да се прават во клиниките, а не во непроверени салони, предупредувајќи дека секоја козметичка интервенција може да има некои компликации.