ВМРО ДПМНЕ како што ги преспа, двата силни брана на Ковид 19, според тврдењето на нивниот лидер Мицкоски, продолжува да спие и за време на вакцинацијата на населението, стои во соопштението на СДСМ.
-Да не спиеше ВМРО ДПМНЕ ќе знаеја дека 800.000 дози вакцини купени од производителот Фајзер, се испорачуваат во нашата земја од пред 5 месеци, и тоа секој понеделник.Ако не беа на одмор ВМРО ДПМНЕ ќе знаеја дека 200.000 купени вакцини од кинескиот производител Синофарм, веќе се искористени за вакцинација на граѓаните. Да не спиеја ВМРО ДПМНЕ исто ќе знаеја дека од март почна испорака на вакцини кои ги купивме и преку Ковакс механизмот, посочуваат од партијата.
Оттаму додаваат дека ВМРО ДПМНЕ ќе знаеја дека во тек е теренска вакцинација и граѓаните можат да се вакцинираат и без термин затоа што благодарение на одлично поставениот систем на имунизација за скоро три месеци вакцинирани се сите граѓани кои беа пријавени да се вакцинираат.
-Не очекуваме дека ВМРО ДПМНЕ ќе ги повика граѓаните да излезат и да се вакцинираат во што поголем број, затоа што на ВМРО ДПМНЕ единствено им е важно собирање ситни политички поени, а не здравјето на граѓаните, велат од партијата.