Претседателот на Белорусија, Александар Лукашенко, соопшти дека ќе ја напушти својата функција „многу скоро“.
– Не погодувајте кога Лукашенко ќе замине. Многу скоро – рече Лукашенко на конференцијата „Голем разговор со претседателот“.
Белорускиот лидер изјави дека постојано размислувал за тоа како ќе се развива ситуацијата во земјата ако на негово место дојде друго лице.
– Тоа е најтешкото прашање (за наследникот). Зошто е тешко? Би можел да одговорам, според зборовите на мојот добар пријател и постар брат Владимир Путин: кога ќе избере белорускиот народ, тој ќе биде претседател. Тоа е навистина точно. Оној за кого народот ќе гласа. Каков став ќе имам тогаш, се уште не знам. Чесен збор. Размислувам за тоа, што е природно. Ова не е вечна должност – рече Лукашенко.
Тој додаде дека 15-20 луѓе имаат потенцијал да ја преземат претседателската функција и дека се слични на Лукашенко во нивната посветеност кон Белорусија.