Фудбалскиот тренер на Ливерпул, Јирген Клоп очекува Мохамед Салах да потпише нов договор со клубот, како и дека ќе има идентична, долга кариера како Лионел Меси и Кристијано Роналдо.
Салах, кој има уште 18 месеци од актуелниот договор, преговара со Ливерпул за продолжување на соработката, но се уште не добил понуда која ја смета за прифатлива.
Во неодамнешното интервју за магазинот GK тој изјави дека не бара „луди работи“ и дека сака да биде ценет за се што направил за клубот.
Клоп изјави дека е „многу позитивен“ во однос на останувањето на Салах на „Енфилд“ и дека нема ништо чудно во должината на преговорите.
-Знам дека Мо сака да остане. Сакаме Мо да остане. За овие работи е потребно време и не можеме да го промениме тоа. Засега се оди добро, изјави Клоп.
Клоп изјави и дека е сигурен оти 29-годишниот Салах, кој моментално е со репрезентацијата на Купот на африканските нации, може да игра на одлично ниво до годините што сега ги имаат Меси и Роналдо.
-Неговиот карактер, неговата одлучност, начинот на кој тренира… Неговиот став е неверојатен. Го знае своето тело, знае што треба да прави. Се труди постојано да се подобрува, изјави Клоп.